وێنەی بوک و زاواکەی حەمدانیە.
تەندروستی نەینەوا: دایکی زاواکەی حەمدانیە گیانی لەدەست نەداوە
964+
زەید کۆچەر – دهۆک
دوای ئەوەی دەنگۆی گیانلەدەستدانی بڵاوبووەوە، تەندروستی نەینەوا رەتیدەکاتەوە دایکی زاواکەی حەمدانیە گیانی لەدەستدابێت.
بەشار جادر بەڕێوەبەری راگەیاندنی تەندروستی پارێزگای نەینەوا بە 964ـی وت، ئەو دەنگۆیە بەوانیش گەیشتووە، بەڵام لە پاش سۆراغکردن، بۆیان دەرکەوتووە کە راست نییە و دایکی زاواکە لە ژیاندا ماوە.
شەوی 26 لەسەر 27ـی ئەیلوولی 2023، لە هۆڵی هەیسەم لە قەزای حەمدانیەی پارێزگای نەینەوا، لەکاتێکدا کە نزیکەی هەزار کەس لەناو هۆڵەکەدا بوون و ئاهەنگێکی هاوسەرگیری بەڕێوەدەچوو، ئاگر کەوتەوە و کارەساتی خوڵقاند. سەدان گیانلەدەستدان و برینداربوونی لێکەوتەوە.
راگەیاندنی تەندروستی نەینەوا وتیشی، تەرمی 38 لەو کەسانەیان لا ماوە کە لە رووداوەکەدا گیانیان لەدەستداوە، هێشتا نەناسراونەتەوە.
لە لایەکی دیکە، کەسوکارێکی بوک و زاواکە بە 964ـی وت، هەواڵەکە راست نییە و دایکی زاوا گیانی لەدەست نەداوە.
ئەگەرچی هێشتا ژمارەکە بە تەواوی رانەگەیەنراوە، بەڵام دەوترێت لە رووداوەکەدا، زیاتر لە 100 کەس گیانیان لەدەستداوە و نزیکەی 150 کەسیش بریندارن.
