نزیک شارەوانی بناری قەندیل بۆردومان کرا
964+
هاوبەش ئەبوبەکر
کەمێک پێش ئێستا فرۆکەی بێفرۆکەوانی تورکیا لە گوندی بۆکریسکان ئۆتۆمبێلێکی لە نزیک شارەوانی بناری قەندیل کردە ئامانج و زیانی مادی لێکەوتەوە.
ئەمڕۆ سێشەممە 5.9.2023، دڵشێر ئیبراهیم مەولود هاوسەرۆکی شارەوانی بناری قەندیل بە 964ـی راگەیاند، لە نزیک کاتژمێر 6:00ـی ئێوارە، فڕۆکەیەکی بێفڕۆکەوانی تورکیا بە موشەکێک ئۆتۆمبێلێکی لە نزیک شارەوانی بناری قەندیل کردە ئامانج و زیان بەر کۆگای سوتەمەنی شارەوانی کەوتووە.
وتیشی، لەدوای تەواوبوونی دەوام ئەو هێرشە کراوە و هیچ کارمەندێکی شارەوانی لەوێ نەبووە، بەڵام ئاگر لە بەشی کۆگای سوتەمەنی شارەوانییەکە کەوتووەتەوە و هاوڵاتیان سەرقاڵی کوژاندنەوەی ئاگرەکەن.
“موشەکەکە لە باڵەخانەی شارەوانی نەداوە، بەڵام ئۆتۆمبێلکی نەناسراو کە لە نزیک ئەوێ وەستاوە و شۆفێرەکەی لەوێ نەبووە، بەرکەوتووە و بووەتە هۆی کەوتنەوەی ئاگر لە بەشی سوتەمەنی”، دڵشێر ئیبراهیم مەولود وای وت.