کێشەی کارەبای ئەمین باپیر بەرەو چارەسەرکردن دەچێت
964+
راژان باجەڵان – خانەقین
گوندی ئەمین باپیر ماوەی 15 ساڵە کێشەی کارەبایان هەیە و ئێوارەی ئەمڕۆ سێشەممە بەڵێنی چارەسەرکردنیان پێدراوە.
ئەمڕۆ سێشەممە 25.7.2023 ژمارەیەک لە دانیشتوانی گوندی ئەمین باپیر لەناو گوندەکەیان گردبوونەوەیەکیان ئەنجامدا و داوای چارەسەرکردنی کارەباکەیان دەکرد.
گوندی ئەمین باپیر دەکەوێتە دووری دوو کیلۆمەتر لە خانەقین بە ئاراستەی باکووری شارەکە.
کێشەی گوندەکە محاویلەکەیەتی، کە 200 ماڵی لەسەرە و بەرگەی ئەو فشارە زۆرە ناگرێت.
شەهاب زۆراب، دانیشتوویەکی ئەو گوندەیە و بە تۆڕی 964ـی راگەیاند، ماوەی 15 ساڵە ئەم گوندە ئاوەدان بووەتەوە و هەر لەوساوە کێشەی محاویلەی کارەبایان هەیە.
وتیشی، “قائیمقامی خانەقین ئەمڕۆ سەردانی گوندەکەی کرد و فەرمانی کردووە محاویلەیەکی دیکەمان بۆ دادەندرێت و کێشەکەمان چارەسەر دەکرێت”.
پێداچوونەوە: پێشەوا محەمەد
