لەمەودوا شارەوانی کەلار بە سکانکردنی QR کۆدە شارەکەی خاوێندەکاتەوە

میلاد جەلال – کەلار

کەلار لە رێگەی سیستمێکی نوێوە کوچە و کۆڵان و گەڕەکەکانی لە پاشماوەکان خاوێندەکاتەوە، ئەم کارەش لە رێگەی شارەوانی شارەکەوە دەکرێت و ئەوانیش لە رێگەی سیستمەکە بە هاولاتیان دەڵێت لەهەر کوێیەک زبڵ و خاشاکتان بینی سکانی QR کۆدەکەمان بکەن و یەکسەر دەگەینە لاتان

ئەو سیستمەی شارەوانی باسیدەکات دەڵێت بێوێنەیە و یەکەمجارە لەهەرێمی کوردستان کاری لەسەر دەکرێت، هۆکارەکەشی بۆ ئەوە دەگەڕێتەوە کە زۆرجاران تیمەکانیان بەهۆی سەرقاڵی زۆریانەوە فریای هەموو شوێنێک ناکەون، بەڵام ئەم سیستمە ئەمە کارئاسانیەکی باشە بۆیان و ھاوڵاتیانیش دبنە ھاوکاریان پۆ پاکڕاگرتنی ژینگەی شارەکەیان.

دلێر حوسێن، سەرپەرشتیاری پرۆژەکانی شارەوانی کەلار بە 964 ى وت،”لەسەر هاوڵاتییە کە لە هەر پاشماوەی بینی تەنیا کیوئاڕکۆدەکەمان سکان بکات و تیمەکانمان بەزووترین کات دەگەنە لایان و شوێنەکە پاکدەکەنەوە”.

ئاماژەی بەوەشکرد، لە رۆژانی داھاتوو، کیوئاڕکۆدەکە بەردەست دەبێت بۆ ھاوڵاتیان و ھەوڵدەدەن لە شوێنە گشتیەکانیش دابنێین بۆئەوەی ھاوڵاتی بەئاسانی دەستی پێبگات.

پێداچوونەوە؛ فەرهاد حەسەن