کەمبارانى رەنجى جوتیاران بەخەسار دەبات

964+

وریا فەتاح

بەهۆى کەمبارانییەوە، بەشێکى زۆرى گەنمى جوتیاران لەسەرتاسەرى هەرێمى کوردستان توشى زیان بوون، وەزیرى کشتوکاڵیش دەڵێت: هەر زوو جوتیارانمان ئاگادار کردەوە کە ئەمساڵ باران کەم دەبێت.

حکومەتى هەرێم قەرەبووى راگرتووە، تەنیا ئەگەر عێراق شتێک بکات

لە دەشتى بیتوێن و بەرى مەرگە و سنوورى هەولێر و گەرمیان و بەشێکى سلێمانیش، بەهۆى کەمى رێژەى بارانبارین، گەنم و جۆى جوتیاران لەگەشەکردن وەستاوە، هەندێ جوتیاریش بە تەواوەتى دەستبەردارى بەرهەمەکەیان بوون.

لەسەر ئەو بابەتە 964 قسەى لەگەڵ بێگەرد تاڵەبانى وەزیرى کشتوکاڵ و سەرچاوەکانى ئاو کرد، ئەو وتى،”ئێمە پێش داچاندنی گەنم ئاگاداری جوتیارانمان کردەوە کە ئەمسال رێژەی باران کەم دەبێت و ناتوانن وەک پێویست دەستەبەری ئاوی باران بکەن لە زەوی دێمی، هەر بۆیەش لە عێراق ریژەی وەرگرتن کەم کرایەوە”.

لەبارەى خەمڵاندنى زیانەکانى بەرهەمى گەنم و جۆ و قەرەبووکردنەوەى جوتیاران، وەزیرى کشتوکاڵ وتى،”بەرێوەبەرایەتی گشتی کشتوکاڵی پارێزگاکانمان رادەسپێرین کە خەملاندنی زیانەکان بکات، بەڵام بەهۆی کێشەی داراییەوە حکومەت لە ئەنجومەنی وەزیران قەرەبوی راگرتوە، تەنیا ئەگەر عێراق شتێک بکات و بریارێک بدات، ئێمەش هەوڵ بدەین جوتیارانمان لێی سودمەند بن”.

964 ویستى بزانێت وەزارەتى کشتوکاڵ پێشبینى چى دەکات بۆ کەمبوونەوەى بەرهەمى گەنم و جۆ، بەڵام وەزیرى کشتوکاڵ بەم شێوەیە وەڵامى دایەوە،” جارێ زووە”.

کەمبارانى وایکردووە، گەنم و جۆى ئەمساڵ توشى زیانى گەورە بێت، بەشى زۆرى گەنم و جۆ لە گەشەکردن وەستاوە، بەشێکیشى بەشێوەیەک توشى تینوێتى بووە کە چاوەڕێ ناکرێت جوتیاران دەنکى لێ هەڵبگرنەوە، هەربۆیە بۆ ئەمساڵ پێدەچێت بەشێکى زۆرى جوتیاران رەنج بە خەساربن.

هەرچەندە لە سنوورى هەولێر و گەرمیان و کەمینەیەکى سنوورى راپەڕین، بەهۆى کەمبارانییەوە جوتیاران ئاوپژێن بەکاردەهێنن، بەڵام زۆرینەى جوتیارانى دیکە بەتایبەت ناوچەکان سنوورییەکان خۆیان بۆ ئەو حاڵەتە ئامادە نەکردبوو، هەر بۆیە گەنم و جۆکەیان توشى زیان بووە

کاریگەرییەکانی کەمبارانیی لە دەشتی بیتوێن دەرکەوتن