نرخی نەوت کەمێک بەرزبووەتەوە

+964

توانا نەقی

لەچاو دوێنێدا نرخی نەوت کەمێک بەرزتر بووەتەوە بەڵام هەر لە 81 دۆلاردایە و بە چەند سەنتێک جیاوازترە لە دوێنێ و پێرێ.

دابەزینی بەردەوامی چەند رۆژی رابردوو هۆکارەکەی بۆ کەمبوونەوەى خواستى چین و بەرزى کۆگاکردنى نەوت لە ئەمەریکا و ئەگەرى رێککەوتنى حەماس و ئیسرائیل بوون.

بەپێى داتاکانى بازاڕى جیهانى بۆ ئەمڕۆ دووشەممە، بۆ هەر برمیلێک نرخی نەوتی برێنت بە 81 دۆلار و 49 سەنتە بەوەش بە رێژەی 0.36% بەرزبووەتەوە.

هاوکات نرخی نەوتی سووکی تێکساسی ئەمریکا 77 دۆلار و 45 سەنتە و بەوەش نرخەکەی بە رێژەی 0.29% بەرزبووەتەوە.

بەپێی راپۆرتى پەیمانگەی نەوتی ئەمریکا، هەفتەی رابردوو قەبارەی نەوتی کۆگاکراو لەو وڵاته‌ سێ ملیۆن و 900 هەزار بەرمیل کەمیکردووە. هاوکات قەبارەی بەنزینی کۆگاکراویش 2.8 ملیۆن بەرمیل کەمیکردووە لە هەمان ماوەدا.