دیمەنێکی قەزای دەربەندیخان. وێنە:سۆشیال میدیا
ئیدارەی قەزاکە وادەڵێت
تامانگی 9ـی ئەمساڵ دەتوانن خانووە زیادەڕۆکانتان لە دەربەندیخان تاپۆ بکەن
964+
توانا نەقی
ئەو وادەیەی بۆ تاپۆکردنی خانووە زیادەڕۆکان و هەندێک گەڕەک دەستنیشان کرابوو لە دەربەندیخان زۆری نەماوە کۆتایی پێبێت و ئیدارەی قەزاکەش داوادەکات هاوڵاتیان مامەڵەکانیان بۆ ببەن.
لە ساڵی 2021ـەوە تا ئێستا چەندین مامەڵەی تاپۆکردنی خانووی زیادەڕۆیان تەواو کردووە و بەردەوامیش دەبن تا مانگی 9ـی 2024.
سلێمان محەمەد قایمقامی دەربەندیخان بە 964ـی وت، تاپۆکردنەکە بە پێی یاسای ژمارە 7ـی ساڵی 2021 دەکەن و تا ئێستا درێژ کراوەتەوە ماوەکەی بۆ ئەوەی زۆرترین هاوڵاتی لێی سوودمەند بێت.
وتیشی، تا مانگی 9ـی 2024 کار بەو یاسایە دەکرێت و داوا لەو هاوڵاتیانە دەکەین تا ئێستا مامەڵەیان نەکردووە، دەستپێبکەن بۆ ئەوەی خانووەکانیان بە پێی یاسا و رێنمایی تاپۆ بکرێت.
سەبارەت ئەو ماڵانەی دەکەونە ناو سنووری پرۆژەی خزمەتگوزاری و رێگاوبان بە پێی یاسا قەرەبوو دەکرێنەوە، بە نموونە دوێنێ قەرەبووی دوو ماڵ کراوەتەوە کە خانووەکانیان کەوتووەتە بەر دروستکردنی قوتابخانە، لەبری ئەوە دوو پارچە زەوییان پێدراوە، قایمقامی دەربەندیخان وادەڵێت.
