بەنداوی دەربەندیخان - وێنە: 964
60 مێگاوات کارەبا بەرهەم دەهێنێت
داوای بەگەڕخستنەوەی پرۆژەی بەنداوی بەردەسوور دەکرێت
964+
ژووری هەواڵ
ئیدارەی گەرمیان داوای بەگەڕخستنەوەی پرۆژەی بەنداوی بەردەسور دەکات، سەرپەرشتیاری ئیدارەکە ئەم داوایەی گەیاندووە بە بەڕێوەبەری گشتی بەنداوەکانی هەرێم.
رەحمان خانی، بەڕێوەبەری گشتی بەنداوەکانی هەرێم سەردانی ئیدارەی گەرمیانی کرد، لە کۆبوونەوەیەکدا لەگەڵ بەرپرسانی ئیدارەکە باسیان لە بەگەڕخستنەوەی پرۆژەی بەنداوی بەردەسور لەسەر روباری سیروان کردووە لە کەلار، کە لە ساڵانی رابردوودا بەهۆی قەیرانی داراییەوە پرۆژەکە جێبەجێ نەکرا.
چۆمان ئەحمەد، بەڕێوەبەری راگەیاندن و پەیوەندییەکانی ئیدارەی گەرمیان بە 964ـی راگەیاند، بەڕێوەبەری گشتی بەنداوەکانی هەرێم “بەڵێنیداوە هەوڵەکانیان چڕبکەنەوە بۆ ئەوەی دەستبکرێت بە جێبەجێکردنی پرۆژەکە”.
بەنداوی بەردەسوور كە بە یەكێک لە بەنداوە ستراتیژییەكان دادەنرێت بۆ گەرمیان، لە ساڵی 2018ـەوە نەخشەو پلانی كاری بۆ داڕێژراوە و رەوانەی ئەنجومەنی وەزیران كراوە، بەڵام هێشتا نەچووەتە بواری جێبەجێكردنەوە.
پرۆژەی بەنداوی بەردەسوور کە دەكەوێتە باکووری رۆژهەڵاتی کەلار، توانای گلدانەوەی 168 ملیۆن مەتر سێجا ئاوی هەیە، دەشتوانێت 60 مێگاوات کارەبا بەرهەم بهێنێت.
