کەلار دەبێتە خاوەن پارکێکی گەورەی خێزانی

964+

میلاد جەلال – گەرمیان

شارەوانی قەزای کەلار کارەکانی دروستکردنی پارکێکی گەورەی خێزانی لە قەزاکە دەستپێکردووە، کە دەبێتە گەورەترین پارک لە سنووری ئیدارەی گەرمیان.

پارکەکە دەکەوێتە پشتەوەی زانکۆی گەرمیان کەمپی بەردەسور لەسەر رووبەری 130 دۆنم زەوی دروستدەکرێت.

دلێر حسێن بەرپرسی بەشی پرۆژەکان لە شارەوانی کەلار بە 964ى وت، پرۆژەکە کارکردن تێیدا دەستیپێکردووە و سەرقاڵی کۆنکرێتی سیاجی پارکەکەن، قۆناغ بە قۆناغ کارەکانی دیکەی جێبەجێدەکرێت، بەتەواو بوونی دەبێتە گەورەترین پارکی خێزانی لە سنووری گەرمیان.

وتیشی، بودجە و کات بۆ پرۆژەکە دیارینەکراوە، بەپێی بودجەی بەردەستی شارەوانی و لە رێگەی خۆبەخش و وەبەرھێنەوە بەشێوەی مساتەحە، پارکەکە و بەشەکانی دیکەی دروست دەکرێت.

پارکەکە رێستۆرانت و کەپر و شوێنی حەوانەوە لە خۆدەگرێت، لەگەڵ جێگایەک بۆ نمایشی چالاکی و شانۆ و بابەتە ھونەریەکان، دلێر حسێن وای وت.

لە قەزای کەلاری ناوەندی ئیدارەی گەرمیان 64 پارک و باخچە بوونیان ھەیە، رێژەی سەوزایی لەقەزاکە گەیشتۆتە نزیکەی 7.5%.

پێداچوونەوە: توانا نەقی

+2