وێنەی یەکێک لە پڕۆژە نیشتەجێبوونەکانی سلێمانی - وێنە: 964
لە هەرێمی کوردستان
کارەبای 45 هەزار یەکە کراون بە پریپەید
964+
پێشەوا محەمەد
لە هەرێمی کوردستان کارەبای 45 هەزار یەکەی پڕۆژە نیشتەجێبوونە های کۆستەکان کراون بە پریپەید و وەزارەتی کارەباش دەڵێت، “بەردەوام دەبین”.
پڕۆسەکە پارەدانی پیشوەختەی بەکارهێنانی کارەبایە هاوشێوەی پڕکردنەوەی باڵانسی مۆبایل و حکومەتی هەرێم وەک پڕۆسەیەکی ئەزموونی لە شارە نیشتەجێبوونەکانەوە دەستیپێکردووە.
ئومێد ئەحمەد، وتەبێژی وەزارەتی کارەبای حکومەتی هەرێم بە 964ـی راگەیاند، تا ئێستا 45 هەزار یەکەی نیشتەجێبوونی پڕۆژە های کۆستەکان کراون بە پریپەید و پڕۆسەکەش بەردەوامە و زیاتر دەکرێن.
وتیشی، “ئەو پڕۆسەیە وا دەکات هاونیشتیمانیان بەردەوام کارەبای نیشتیمانییان هەبێت و لەناو کۆڵان و گەڕەکەکانیش ئەنجام دەدرێت، بەڵام نرخەکەی گران ناکرێت”.
پێش ئەو سیستمە نرخی کیلۆواتێک کارەبا بە 18 دینار بوو، بەڵام بە دانانی ئەو سیستمە لە سلێمانی بوو بە 165 دینار و لە هەولێریش 175 دینار.
ناوەڕاستی مانگی رابردوو وەزارەتی کارەبای حکومەتی هەرێم بڕیاریدا نرخی هەر کیلۆواتێک بۆ 100 دینار کەمبکرێتەوە.
خواستی هەرێمی کوردستان بۆ کارەبا لە وەرزی هاویندا شەش هەزار مێگاواتە، بەڵام ئاستی بەرهەمهێنان ناگاتە چوار هەزار مێگاوات.
