پەروێزخان، یەکێک لە دەروازە سنوورییەکانی هەرێم لەگەڵ ئێران - وێنە: 964
ئەگەر دەتەوێت بە ئۆتۆمبێل بچیتە ئێران کەفیلێک ئامادە بکە
964+
پێشەوا محەمەد
تەنیا لە دەروازەی پەروێزخانەوە رێگە بە بردنی ئۆتۆمبێلی تایبەت دەدرێت بۆ ئێران، ئەویش مەرجی هەیە و دەبێت کەسێک کەفالەتی ئەو گەشتیارە بکات کە بە ئۆتۆمبێلی خۆی دەچێتە ئێران.
پێشتر بردنی ئۆتۆمبێلەکە تەنیا دەفتەری گومرگەکەی دەویست.
عەباس ئیسماعیل، سەرپەرشتیاری دەروازەی پەروێزخان بە 964ـی راگەیاند، بەرپرسانی ئێرانیان رازی کردووە بە وەرگرتنی کەفیلێک لە دادنووس هاوڵاتیانی هەرێم بتوانن بە ئۆتۆمبێلی خۆیان سەردانی وڵاتی ئێران بکەن.
لە 25.7.2023ـەوە ئێران گەشتکردنی هاوڵاتیانی هەرێمی بە ئۆتۆمبێلی تایبەت لە دەروازەکانی باشماخ، حاجی ئۆمەران و پەروێزخان قەدەغە کرد، بەڵام دەروازەی پەروێزخان دەرچەیەکی بۆ ئەو کارە دۆزیوەتەوە.