هەریر لە دوورەوە. وێنە: سۆشیاڵ میدیا
ناحیەی هەریر کرا بە قەزا
964+
هاوبەش ئەبوبەکر
ئەنجومەنی پارێزگای ھەولێر بەقەزابوونی ناحیەی ھەریری پەسەند کرد و ناحیەی باسرمەشی پێوەلکاند.
ئەمڕۆ دووشەممە 7.8.2023، غازی عەلی، ئەندامی ئەنجومەنی پارێزگای هەولێر بە 964ـی راگەیاند، بەقەزابوونی ناحیەی هەریر بەکۆی دەنگ پەسەند کرا و هەموو ئەندامانی ئەنجومەنی پارێزگا دەنگیان بە بەڵی دا.
بەپێی بڕیارەکە، ناحیەی هەریر وەک ناوەندی قەزاکە دەسنیشانکراوە، غازی عەلی وای وت.
هەر لە کۆبوونەوەکەی ئەمڕۆدا، بەشێک لە ئەندامانی ئەنجوومەن پێشنیاریانکردووە کە دانیشتنی داهاتوو تایبەت بکرێت بە گرانبوونی نرخی کارەبا، ئەمە قسەی غازی عەلیە بۆ 964.
ناحیەی هەریر سەر بە قەزای شەقڵاوەیە لە پارێزگای هەولێر، دانیشتووانەکەی زیاتر لە 22 هەزار کەسن.
پێشتریش لە رێکەوتی 25.10.2021، ئەنجومەنی پارێزگای هەولێر کۆبوونەوەی ئاسایی ژمارە 93ی خۆی ئەنجام دا و بە تێکڕای دەنگ، هەردوو ناحیەی عەنکاوە و پیرمام بە فەرمی بوونە قەزا.