دیمەنێک لە ناحیەی تەقتەق _ فۆتۆ: تۆڕی کۆمەڵایەتی
لە ئاهەنگێکی هاوسەرگیری لە تەقتەق کەسێک کوژرا
964+
هاوبەش ئەبوبەکر
لە تەقتەق لە ئاهەنگێکی هاوسەرگیریدا شەڕ لە نێوان دوو بنەماڵە دروست دەبێت و بە دەستدرێژی گولە کەسێک دەکوژرێت و یەکێکی دیکەش بریندار دەکرێت.
شیروان جەلال، بەڕێوەبەری نەخۆشخانەی کۆیە بە 964ـی راگەیاند، شەڕەکە بەهۆی کێشەیەکی کۆمەڵایەتی دروست بووە و تەقەکەرەکان دوو کوڕ و باوکێک بوون، کە خەڵکی ناوچەی “جگیلە”ـن لە باشووری تەقتەق.
وتیشی، سەرەتا بریندارەکان هێندراونەتە نەخۆشخانەی کۆیە و چارەسەری پێویستیان بۆ کراوە، بەڵام یەکێکیان لە رێگە لە کاتی گواستنەوە بۆ نەخۆشخانەی کەرکوک بەهۆی سەختی برینەکەی گیانی لەدەستداوە.
کوژراوەکە تەمەنی 50 ساڵە و بریندارەکە تەمەنی 19 ساڵە، لەگەڵ تەقەکەرەکاندا خزمی یەکدین، ئاهەنگەکە لە پارکی چەمی کوێخا رەشید لە تەقتەق بەڕێوەچووە.
پۆلیسی تەقتەق لە راگەیەندراوێکدا دەڵێت، تۆمەتبارەکان لە دوای رووداوەکە هەڵاتوون و فەرمانی دەسگیرکردنیان بۆ دەرچووە بە پێی ماددەی 405 – 31 لە یاسای سزادان.