تۆمەتباری سووتاندنی پیاوەکەی خانەقین دەستگیرکرا

964+

راژان باجەڵان – خانەقین

دوای ئەوەی بۆ ماوەی رۆژێک وەستایەکی ئۆتۆمبێل لە خانەقین دیار نامێنێت بە کوژراوی تەرمەکەی دەدۆزرێتەوە.

عەباس عەلی، خەڵکی خانەقینە و لە دایکبووی ساڵی 1972ـە و پیشەی وەستای چاککردنی ئۆتۆمبێل بوووە رۆژی یەکشەممە 16.7.2023 لەبەردەم دوکانەکەی خۆی لە ناوچەی پیشەسازی مەلکشاه بە بیانووی
بردنی بۆ چاککردنی ئۆتۆمبێلێکی پەککەوتوو دەڕفێنرێت و بۆ ماوەی رۆژێک دیار نامێنێت.

دوای ئەوەی لەلایەن کەسوکارییەوە هێزە ئەمنییەکان ئاگادار دەکرێنەوە، هەوڵەکانیان چڕ دەکەنەوە و بۆ رۆژی دووەم پاش دۆزینەوەی سەرەداوی رووداوەکە
تۆمەتبارێک دەسگیردەکەن.

سەرچاوەیەک لە پۆلیسی خانەقین بە 964ی راگەیاند، تۆمەتبار پاش دەسگیرکردنی یەکسەر
دانی بە تاوانەکەیدا ناوە و شوێنی ناشتنی تەرمەکەی ئاشکرا کردووە و دوو کەسی تر کە هاوبەشی بوون
لە تاوانەکەدا گەڕان
بەدوایاندا بەردەوامە.

دکتۆر شوان شاکر، بەڕێوەبەری نەخۆشخانەی خانەقین بە 964ـی راگەیاند، کەسە کوژراوەکە ئاسەواری ئەشکەنجەدانی پێوە دیاربووە و  پاش کوشتنی بە فیشەکێک چەند شوێنێکی گیانی ئازار دراوە و پاشان سوتێنراوە و نێژراوە، پاش هێنانی
بۆ نەخۆشخانەی خانەقین و وەرگرتنی رێکاری پێویست رەوانەی پزیشکی دادی بەعقوبە کراوە.

کەس و کاری کوژراوەکە دەڵێن، کوڕەکەیان دوژمنداری لەگەڵ کەسدا نییە و هیچ کێشەیەکی نەبووە، عەباس رۆژانە تەنیا خەریکی کەسابەتی
خۆی بووە و ئەم رووداوە هەموویانی شۆککردووە.

پێداچوونەوە: توانا نەقی