ئاسایشی سلێمانی: 93 بازرگانی ماددەی هۆشبەر دەستگیرکراون

964+

ئەحمەد مستەفا

دەزگای ئاسایش لە سلێمانی ئاماری شه‌ش‌ مانگى رابردووى ده‌ستگیركردنى بازرگانانى ماده‌ى هۆشبه‌رى بۆ 964 ئاشكرا كرد و رایگه‌یاند، لە ماوه‌ى ئه‌م شەش مانگه‌دا، 478 کەس لەسەر مامەڵە و بەکارهێنانی ماددەی هۆشبەر دەستگیرکراون.

لەو ژمارەیە، 93 کەسیان بازرگان بوون و 385 کەسیشیان بەکارهێنەر.

ئامارەکەی دەزگای ئاسایش لە سلێمانی گوزارشت لە نێوان 1.1.2023 بۆ 30.6.2023 دەکات، کە لە چالاکییەکانیدا لە سنوری پارێزگاکانی سلێمانی و هەڵەبجە، ئیدارەکانی گەرمیان و راپەرین ئەنجامیداون.

ئەمرۆ پێنجشەممە 13.7.2023، عەقید سەلام عەبدولخالق، وتەبێژی دەزگای ئاسایش لە سلێمانی تایبەت بە 964 رایگه‌یاند “سەرجەمی بازرگانەکان لە دەزگای ئاسایش دۆسیەیان بۆ کراوەتەوە و پاش رێکاری دادوەری لێکۆڵەر و سەلماندن، بڕیار لەجۆرێتی سزادانیان دەدرێ”.

بەوتەی عەقید سەلام عەبدولخالق بێت “ئەو کەسانەی دەستگیریان کردوون بە گشتی تەمەنیان لەنێوان 18 بۆ 35 ساڵە، کە حاڵەتی خوار تەمەن 18 ساڵ و تەمەن 40 ساڵیشیان هەبووە”.

زۆرینەی ئەو ماددانەی پێیانبووە لە جۆری کریستاڵ، حەشیش، حەبی هۆشبەر بووە.

وتیشی “یاسا، ماددەکانی 30 و 36ـى لە یاسای بەرەنگاربوونەوەی مادە هۆشبەر و کارتێکارە دەروونییەکان لە هەرێمی کوردستانی داناوە بۆ دادگایکردنیان”.

پێداچوونه‌وه‌: فه‌رهاد حه‌سه‌ن