رێنمایی زانستی دەدرێتە جوتیاران

964+

پێشەوا محەمەد

کشتوکاڵی سلێمانی هەڵمەتی هۆشیاری زانستی بۆ جوتیاران دەستپێکردووە و رێنماییان سەبارەت بە بەکارهێنانی مادە قڕکەرەکان و پەیین پێدەدات.

هەڵمەتەکە زیاتر لە دوو هەفتەیە دەستیپێکردووە و لە لایەن هۆبەی رێنمایی بەڕێوەبەرایەتییەکانی کشتوکاڵی سنووری پارێزگای سلێمانییەوە بەڕێوەدەبرێت.

پێدانی رێنمایی سەبارەت بە بەکارهێنانی پەیین و مادە قڕکەرەکان ساڵانە بە پێی وەرز و جۆری میوە و سەوزەکان بەردەوام دەبێت.

شاڵاو جەمال، بەڕێوەبەری کشتوکاڵی سلێمانی بە 964ـی راگەیاند، هەڵمەتەکە زیاتر هۆشیاری زانستییە تا جوتیاران فێربکرێن بە پێی بڕی تەندروست و رێگەپێدراو پەیین و مادە قڕکەرەکان بەکاربهێنن.

وتیشی، “تیمەکان بە بەردەوام لە بەڕێوەبەرایەتییەکان هەوڵی تەواو دەدەن بۆ هۆشیارکردنەوەی جوتیاران بەتایبەت لە رووی زانستی و دڵنیایی لە تەندروستبوونی بەرهەمەکانیان”.