لە سێ رۆژدا 300 دۆنم دارستان و پووش و پاوانی شارباژێڕ سووتاون

964+

هاوبەش ئەبوبەکر

لە ماوەی سێ رۆژی رابردوودا، ئاگر نزیکەی 300 دۆنم دارستان و پووش و پاوانی لە سنووری شارباژێڕ سووتاندووە.

دواین جار کە ئاگر لەو سنوورە کەوتەوە، لە رۆژی شەممە 1.7.2023 بوو لە گوندی کانی سارد، کە بووە هۆی سووتانی پێنج دۆنم پوش و پاوان و باخێک.

زۆرترین زیان بەر زەوییەکانی گوندی بێورێ کەوتووە و رووبەرێکی فراوانی گوندەکە سووتاوە.

لە ماوەی 10 رۆژی رابردوودا چوار جار ئاگر لە شارباژێڕ کەوتووەتەوە و بەو هۆیەوە سەدان دۆنم دارستان و پاوان و دەغڵودان سووتاون.

ئەمڕۆ یەکشەممە 2.7.2023، هێمن کەمەرخان، وتەبێژی پۆلیسی دارستان و ژینگەی سلێمانی بە 964ی راگەیاند، لە ماوەی دوو هەفتەدا سێ کەس کە گومانیان لێدەکرێت هۆکاری کەوتنەوەی بەشێک لە ئاگرەکان بن، دەستگیرکراون.

بێورێ کەوتووەتە ناحیەی سیوەیلی قەزای شارباژێڕ لە پارێزگای سلێمانی.