پردی ناڵپارێز لەکاتی نۆژەنکردەوەیدا، فۆتۆ: رێگەوبانی سلێمانی
پردەکە نۆژەنکرایەوە
لەمەودا پردە ئاسنەکەی ناڵپارێز کەمتر تەقەتەق دەکات
964+
هاوبەش ئەبوبەکر
دوای نزیکەی مانگێک، کاری نۆژەنکردنەوەی پردە ئاسنەکەی ناڵپارێز کۆتایی هات و دوای کردنەوەی، شۆفێران دەتوانن بەسەریدا بپەڕنەوە و لە جاران کەمتر تەقەتەق دەکات.
پردەکە کەوتووەتە سنووری قەزای پێنجوێن و لە رێکەوتی 31.5.2023 دەستکرا بە نۆژەنکردنەوەی و لە 14.6.2023 داخرا و بڕیار بوو تا 29.6.2023 نەکرێتەوە، بەڵام چوار رۆژ زووتر کرایەوە.
ئەمڕۆ دووشەممە، فواد حەمەباقی، بەرپرسی راگەیاندنی بەڕێوەبەرایەتیی چاککردن و پاراستنی رێگەوبانی سلێمانی بە 964ی راگەیاند، پردەکە تەمەنی زۆرە و بەشێک لە جۆینەکانی خراپببوون و پێویستیان بە گۆڕین هەبوو، بەڵام ئێستا هیچ کێشەی نەماوە.
وەزارەتی ئاوەدانکردنەوە و نیشتەجێکردن بڕی 54 ملیۆن و 600 هەزار دینار بۆ نۆژەنکردنەوەی پردەکە تەرخان کردبوو.