نرخی مریشک بەهۆی بایکۆتی خاوەن کێڵگەکانەوە بەرز بووەتەوە
964+
دیلان محەمەد جەزا
نرخی مریشک بەراورد بە مانگێک لەمەوپێش هەزار دینار چووەتە سەر نرخەکەی و هەر کیلۆیەکی لە بازاڕدا بە سێ هەزار و 500 دینارە.
نازم عەبدوڵا سەرۆکی کێڵگە پەلەوەریەکان بە 964ـی رایگەیاند، بەھۆی زەرەرمەند بوونی خاوەن کێڵگە پەلەوەریەکانەوە ھەندێکیان بایکۆتیان کردووە و ھۆڵەکانیان پڕ ناکەنەوە، ھەر بۆیە مریشک لە بازاڕدا رێژەکەی کەم بووەتەوە و نرخی بەرزە.
باسی لەوەکرد، لە ماوەی رابردوودا نرخی مریشک بە شێوەیەکی بەرچاو دابەزی، ئەوەش وایکرد خاوەن کێڵگەکان بە زەرەر مریشکەکانیان بخەنە بازاڕەوە.
سۆران غەفور، بەڕێوەبەری چاودێری بازرگانی سلێمانی بە 964 راگەیاند، ئەو بەرز و نزمییە لە بازاڕدا روو دەدات و مریشک بە نرخی خۆی دەفرۆشرێت ئێستا.
کاردۆ سەعید، فرۆشیاری مریشکە بە 964 راگەیاند، ئێستا لە بازاڕدا مریشکی بچوک زۆر کەمە و لە سەروو سێ کیلۆ و نیو هەیە.
لە سنوری پارێزگای سلێمانیدا 950 پرۆژەی بەخێوکردنی پەلەوەر ھەیە.
پێداچوونەوە: توانا نەقی