هەولێر
شیرینییەکانی یادی مەولود، شەکرە و زەختى هاوڵاتیانی بەرز کردەوە
ئەحمەد شەمزین- هەولێر
لە یادى مەولود، ناوبازاڕى شارى هەولێر پڕبوو لە شیرینى خێر، بەشێک لە هاوڵاتیانیش تا پێیانکرا شیرینیان خوارد، بەڵام شیرینییەکى بۆ تەندروستى ژمارەیەک هاوڵاتى گۆڕا بۆ تاڵى و شەکر و زەختیان فڕى.
پەیمانگای (CMC)ـی شاری هەولێر، چەند تیمێکی پزیشکیی رەوانەی ناو بازاڕ و بەردەم قەڵا کردووە، تاوەکو بەبێ بەرامبەر پشکنین بۆ هاوڵاتیان بکەن.
هێرش هەژار، کە پەرستارێکی پەیمانگاکەیە، بۆ 964 باس لە دۆخەکە دەکات و دەڵێت، “بەهۆی گەرمای کەشوهەوا و خواردنی بڕێکی زۆری شیرینی لەلایەن هاوڵاتیانەوە، زۆربەی ئەوانەی هاتوونەتە لامان زەخت و شەکرەیان فڕیوە، یان بەهۆی ماندووبوونەوە زەختیان دابەزیوە.”
تیمە پزیشکییەکان تەنیا تا کاتی نیوەڕۆ، پشکنینیان بۆ زیاتر لە 300 کەس کردووە، کە پشکنینەکانی (زەخت، شەکرە و رێژەی خوێن) لەخۆدەگرێت و سەرجەمیان بێ بەرامبەرن. لەگەڵ ئەوەشدا، بۆ هەر حاڵەتێکی کتوپڕ و نەخوازراو، ئامبوڵانسێکی فریاگوزارییان لە شوێنەکە ئامادە کردووە.
پێداچوونەوە: وریا فەتاح