کۆمەڵێک لە ژنانی چالاکوانی رۆژهەڵاتی کوردستان دژی گەڕاندنەوەی مامۆستایەکی بۆ زانکۆی کوردستان

فەرهاد حەسەن

کۆمەڵێک لە ژنانی چالاکی رۆژهەڵاتی کوردستان لەبارەی گەڕاندنەوەی مامۆستایەکی زانکۆی کوردستان ناڕەزاییان دەربڕی و دەڵێن، ئەم کەسە دۆسییەیەکی تایبەتی بە گێچەڵی سێکسی هەیە و پێویست ناکات لە دەوامی زانکۆکە بەردەوام بێت.

ژنە چالاکوانەکان راگەیەندراوێکیان بڵاوکردووەتەوە و تیایدا داوا لە کۆمەڵگەی زانستی، رێکخراوە مەدەنییەکان و رای گشتی لە رۆژهەڵاتی کوردستان دەکەن، ئەوان بە نیگەرانییەکی قووڵەوە چاودێریی پڕۆسەی دۆسیەی جەمال محەمەدی، ئەندامی دەستەی زانستیی بەشی کۆمەڵناسیی زانکۆی کوردستان و بڕیاری لیژنەی پێداچوونەوەی وەزارەتی خوێندنی باڵا بۆ بێتاوانکردن و گەڕاندنەوەی ناوبراو بۆ زانکۆ دەکەن.

دەڵێن، ئەم دۆسیەیە دوای ئەوە دروستبوو کە کۆمەڵێک خوێندکاری کچ بێدەنگییان شکاند و سکاڵایەکی بەکۆمەڵیان لەسەر گێچەڵ و دەستدرێژیی جنسیی ئەم مامۆستایە بۆ سەر خۆیان تۆمار کرد.

ئاماژە بەوەدەکەن، ئەگەرچی دۆسیەکە لە قۆناغی سەرەتاییدا و بەپێی بەڵگە و دۆکیۆمێنتە بەردەستەکان بووە هۆی دەرکردنی ناوبراو لە زانکۆ، بەڵام لە قۆناغی پێداچوونەوەدا بڕیارەکە هەڵوەشێندرایەوە و حوکمی گەڕانەوەی بۆ دەرکرا.

لە رێگەی ئەم راگەیەندراوە دەیانەوێت، خەبات لە دژی ئەم دیاردەیە ببێتە یەکێک لە تەوەرە سەرەکییەکانی بزووتنەوەی ئازادیخوازی و یەکسانیخوازی لە رۆژهەڵاتی کوردستان، هاوکاتیش رەخنە لەو میکانیزمانە دەگرن کە دەبنە هۆی بەرهەمهێنانەوەی گێچەڵ و پاراستنی دەستدرێژیکەران لە سزای یاسایی، بەتایبەت لە ناوەندە ئەکادیمییەکاندا.