بارهەڵگرێک وەرگەڕا و سێ کەس برینداربوون

شۆڕش قادری

لە کەلار بارهەڵگرێک لە دوو کەسی دا و وەرگەڕا، جگە لەو دوو هاوڵاتییە شۆفێری بارهەڵگرەکەش برینداربوو و کەپرێکیش زیانی بەرکەوت.

بەپێی راگەیەنراوێکی بەڕێوەبەرایەتی هاتوچۆی گەرمیان، بەرەبەیانی ئەمڕۆ سێشەممە 19.5.2026 لەسەر شەقامی شەستی کەلار، ئۆتۆمبێلێکی جۆری ئەڤیکۆ بەراد دوای ئەوەی کۆنتڕۆڵ لەدەستداوە، دوو کەسی شێلاوە و زیانیشی بە کەپرێکی قەراغ رێگاکە گەیاندووە، دواتر بارهەڵگرەکە وەرگەڕاوە و شۆفێرەکەی برینداربووە.

ئەو دوو هاوڵاتییەی بارهەڵگرەکە لێی داون و برینداربوون، لەدایکبووی ساڵانی 1966 و 1988ـن، شۆفێری ئۆتۆمبێلکەش لەدایکبووی ساڵی 1977ـە، سەرجەمیان ڕەوانەی نەخۆشخانە کراون و لێکۆڵینەوە لە رووداوەکە بەردەوامە.