"وەرنەدەرەوە و ورە بدەن بە خەڵکی رۆژئاوا"
سەرماش نەیتوانیوە خۆپیشاندەران لە سلێمانی بباتەوە ماڵەوە
964+
دیلان محەمەدجەزا – سلێمانی
گردبوونەوە و ناڕەزایەتی بۆ پاڵپشتی لە کوردانی رۆژئاوا لە سلێمانی بەردەوامە و سەرماش ناتوانێ خۆپیشاندەران بباتەوە ماڵەوە.
بەم شەوە درەنگە و بەم وشکەسەرمایە ژمارەیەک لە چاڵاکوان و هاوڵاتیانی سلێمانی چوونەتە بەردەم باخی گشتی و دژی هێرشەکانی سوپای تورکیا و گروپە چەکدارەکان بۆ سەر ناوچەکانی رۆژئاوای کوردستان دروشم دەڵێنەوە.
دایكێک بەخۆی و هەردوو کچەکەی لەناو خۆپیشاندەرانە و دەڵێت، ئەگەر ناشتوانین بچینە رۆژئاوا و چەک هەڵگرین با بێینە دەرەوە و بەم شێوەیە ورە بدەین بە خەڵکی ئەو پارچەیەی کوردستان.
هاوڵاتییەکەی شاری کەرکوکیش بەشێوەزارە شیرینە کەرکوکییەکەی دەڵێت، “خۆمان و ماڵ و مناڵمان قوربان کوردستان بێ، کورد هەر دەمێنێ، بژی کورد و کوردستان”.
پێداچوونەوە؛ شۆڕش قادری
