دیمەنی بەفربارین لە گوندی دێریشکێ، دەڤەری بەرواری باڵا لە قەزای ئامێدی - وێنە: فەرمانگەی میدیا و زانیاری
سەرماوسۆڵە بەردەوام دەبێت
بەفر و بارانبارین دەستپێدەکاتەوە
964+
شۆڕش قادری
رۆژی هەینی بەفر و بارانبارین دەستپێدەکاتەوە و ئەمجارە زۆرترین بەفر لە دەڤەری راپەڕین دەبارێ کە پێشبینیکراوە 20 بۆ 30 سانتیم بەفر ببارێ.
بەپێی پێشبینییەکانی کەشناسی هەرێم، سبەی شەو پێنجشەممە بارستەی هەوایەکی سارد روو لە ناوچەکانی کوردستان دەکات و لە بەرەبەیانی رۆژی هەینیش بەفر و بارانبارین دەستپێدەکات و بەفر دەگاتە سەنتەری پارێزگاکانیش.
کاریگەری ئەو شەپۆڵە تا درەنگانی شەوی هەینی و بەرەبەیانی رۆژی شەممە 24.1.2026 بەردەوام دەبێت، لە سنووری ئیدارەی گەرمیان و بەشێک لە سنووری باشووری پارێزگای هەولێر باران بارینی پچڕ پچڕی مامناوەندی دەبێت، هەندێک کاتیش شڵێوە دەبێت واتە، بەفر و باران ئاوێزانی یەک دەبن.
ژووری ئۆپەراسیۆن بۆ بەڕێوەبردنی قەیران و کارەسات لە هەرێمی کوردستان لە خشتەیەکدا بڕی بەفربارینی لە ناوچەکانی کوردستان بڵاوکردووەتەوە و بەپێی خشتەکەدا، لەو شەپۆلەدا بەڕێژی 20 بۆ 30 سانتیم بەفر لە ئیدارەی سەربەخۆی راپەڕین دەبارێت.
بەفر و بارانبارین بەردەوام دەبێت
