“مەلامەزهەر بێڕێزی بە ئافرەتان و رۆڵ و پێگەی ئافرەت كردووە”

964+

ئەرسەلان عەبدوڵا

دەستەی سەربەخۆی مافی مرۆڤ لە كوردستان، سەبارەت بە لێدوانی مەلا مەزهەر تاهیر رگەیاندراوێكی بڵاوكردەوە و دەڵێن، ” بێڕێزی بە ئافرەتان و رۆڵ و پێگەی ئافرەت كردووە”.

راگەیاندراوەكە ئەمڕۆ دووشەممە 12.1.2026 بڵاوكراوەتەوە و بەم جۆرەیە:

​”بەداخەوە مامۆستایەکی ئایینی لە شاری هەولێر، بە ناوی (مەلا مەزهەر تاهیر)، لە کەناڵێکی میدیایی لێدوانێکی بڵاوکردووەتەوە و بێڕێزییەکی زۆر بە ئافرەتان و ڕۆڵ و پێگەی ئافرەت دەکات، ناوبراو لە ڕوانگەیەکی تەسکەوە ڕۆڵی ئافرەتی کەم کردووەتەوە لە ماڵەوە و وەک خزمەتکارێک وێنای کردووە کە ئەرکەکەی تەنها لە ماڵەوەیە.

ئەو وتانەی ناوبراو بە تەواوی دژی بنەمای ئایینەکانە و پێچەوانەی بنەماکانی مافی مرۆڤ و شکۆی ژنانە؛ بۆ ئەو مەبەستە دەستەی مافی مرۆڤ لە ڕێگەی داواکاری گشتییەوە ئەو کەیسە دەجوڵێنێت و ناوبراو ڕووبەڕووی یاسا دەکاتەوە لەبەر ئەوەی وتەکانی مەلا مەزهەر دژی ماددەی ١٤ی دەستووری عێراقە، کە ئەم ماددەیە بەڕوونی باس لەوە دەکات یەکسانی هەیە لەبەینی ژن و پیاو.

جگە لەوەش هیوادارین وەزارەتی ئەوقاف و یەکێتیی زانایان ڕێکاری پێویست بگرنە بەر بەرامبەر ئەو کەسانەی پێشێلکاری بەرامبەر خەڵک دەکەن لە ژێر ناوی ئایین و مینبەرەکانەوە.

​بەتوندی دژی ئەو جۆرە لێدوانانەین و ئیدانەی دەکەین، بە ڕێزەوەش ڕۆڵی ژنان سەیر دەکەین و بەرز دەنرخێنین.

​دەستەی سەربەخۆی مافی مرۆڤ لە هەرێمی کوردستان

12.1.2026

 مافی مرۆڤ لەسەر تەقەکەردن لە هێمن مامەند هاتە دەنگ