لە چەمچەماڵ بۆردی هاوکاریکردنی زیانلێکەوتووانی لافاو راگەیەنرا

964+

شۆڕش قادری

لە چەمچەماڵ بۆردی هاوکاریکردنی زیانلێکەوتووانی لافاو راگەیەنرا و قەرارە پێش سەری ساڵی نوێی میلادی کۆتایی بە پڕۆسەی هاوکاریکردنەکە بهێنرێت.

لە سەرۆکایەتی زانکۆی چەرموو، بە ئامادەبوونی عەتا محەمەد سەرۆکی کۆمسیۆنی فریاگوزاری و بوژانەوەی چەمچەماڵ و ژمارەیەک چالاکوان و مامۆستای ئایینی و نوێنەری کەسایەتی و ئەندامانی پەرلەمان و چین و توێژەکان، بۆردی هاوکاریکردنی زیانلێکەوتووان لە نوێنەری چین و توێژەکان پێکهێنرا.

بەپێی راگەیەنراوێکی قایمقامیەتی چەمچەماڵ، ئەو بۆردە لە نوێنەرانی دەستەی دەستپاکی، دەستەی مافی مرۆڤ و چاودێری دارایی و چالاکوانان و مامۆستایانی ئایینی پێکهاتووە، دکتۆر ئەحمەد ئەنوەر وەک سەرۆکی بۆرد، مەریوان کەریم ئاغا جێگری بۆرد، وریا عەبدولخالق وەک وتەبێژ و ئاسۆ محەمەد وەک سکرتێر دیاری کراون.

بۆردەکە بڕیاریداوە لیژنەیەک دروست بکات و پڕۆسەی هاوکاریکردنەکە سەرەتا لەو کەسانەوە دەستپێبکات کە ماڵەکانیان زیانی بەرکەوتووە، پاشان دوکان و بازاڕەکان و لە کۆتاییشدا ئەو مەدەنییانەی ئۆتۆمبێلەکانیان تێکچووە.

ئامانجی بۆردەکە ئەوەیە پێش کۆتاییهاتنی ئەم مانگە و سەری ساڵی نوێ، تەواوی پڕۆسەی هاوکاریکردنەکە بە شەفافی و لەژێر چاودێریی میدیاکاندا کۆتایی پێبهێنرێت، هەروەها بڕیارە ڕاپۆرتێکی ورد پێشکەش بە لایەنی ئیداری بکرێت بۆ چۆنیەتی رووبەڕووبوونەوەی کارەساتی سروشتی لە داهاتوودا.

“پرۆسەی کۆکردنەوەی هاوکارییەکان بە چاودێری دەستەی مافی مرۆڤ و چاودێری دارایی و دادوەرەکان کارەکانیان جێبەجێ دەکەن و دەرگاش کراوەیە بۆ چاودێری کردن لەلایەن میدیاکان و چالاکوانانەوە”، قایمقامیەتی چەمچەماڵ وادەڵێت.

هەژماری بانکی بۆ لێقەوماوانی لافاوەکەی چەمچەماڵ کرایەوە

زیانی 651 ئۆتۆمبێل لە لافاوەکەی چەمچەماڵ تۆمارکرا