شەش راوچى دەستگیرکران و چوار سوێسکەى راوکرا و ئۆتۆمبێلێکى راوچیانیش دەستیان بەسەرداگیرا...وێنە: پۆلیسى دارستان و ژینگەى سلێمانى
لە سلێمانى
پۆلیسى دارستان لە مانگى رابردوو 25 راوچى راو کردووە
964+
وریا فەتاح
هەموو ساڵێک لەگەڵ وەرزى بارانبارین، راوکردن بەرەو زیادبوون دەچێت، بەڵام لە سنوورى سلێمانى دۆخەکە بە شێوەیەک بووە راوچییەکان لە جیاتى راوکردنى باڵندە و ئاژەڵى کێوى، خۆیان بوون بە تۆڕى پۆلیسەوە و راوکراون.
مانگى رابردوو، مانگێکى سەخت بووە بۆ راوچیان و تەنیا لە سنوورى بەڕێوەبەرایەتى گشتى پۆلیسى دارستان و سلێمانى، 25 راوچى کەوتوونەتە داوى پۆلیسەوە و دەستگیرکراون.
سنوورى بەڕێوەبەرایەتى پۆلیسى دارستان و ژینگەى سلێمانى پێکهاتووە لەو ناوچانە( سلێمانى، دوکان، چەمچەماڵ، قەرەداغ، سەیدسادق، پێنجوێن، ماوەت).
ئامارەکانى دەستگیرکردنى راوچیان کۆکراوەى یەک مانگى ئەو چالاکیانەیە کە لە پەیجى بەڕێوەبەرایەتى گشتى پۆلیسى دارستان و ژینگەى سلیمانى، بڵاوکراونەتەوە و 964 کۆى کردوونەتەوە.
