دیمەنێک لە پارکی هەوار لە هەولێر - وێنە: بۆ 964 نێردراوە
رێژەی سەوزایی هەولێر 20%
پێنج هەزار داری بەردار لە پارکی هەواری هەولێر چێندراون
964+
دەشتی عارف – هەولێر
لە هەولێر و لەناو پاڕکی هەوار، زیاتر لە پێنج هەزار داری بەردار چێندراون، کە داری پڕتەقاڵ و زەیتوونن و ئەندازەیی پاڕکەکانیش دەیانەوێت لەداهاتوودا رێژەکەی زیاتر بکەن، هەر بەوەش وایانکردووە رێژەیی سەوزایی بگەیەنن بە سەدا 20.
لە پارکەکانی هەولێر زۆربەی ئەو دارانەی چێندراون، داری ژاڵە و سیسەم و ئەلبیزیان، چونکە ئەو دارانە لەگەڵ کەش و هەوای ناوچەکە دەگونجێت.
ئەندازیار رێبین ئەحمەد، بەرێوەبەری ئەندازەی پاڕکەکانی هەولێر، بە964ـی وت، ماوەی دوو ساڵە لەپارکی هەوار و هەولێر سەروو پێنج هەزار دار پڕتەقاڵ و 350 دار زەیتونیش چێندراون هەر لە هەمان پاڕک، ئامانجیشیان زیادکردنی ئەو رێژەیەیە لەداهاتوودا لە پارکەکانی دیکەش.
وەک دەڵێ، ناتوانن داری بەردار لەسەر شەقامە خێرا و سەرەکییەکان یان شوێنی گشتی بچێنین، چونکە لەوانەیە لەکاتی بەرگرتن منداڵ بچێت لێی بکاتەوە، زیان بەدارەکان بگەیەندرێ و مەترسی رووداوی هاتوچۆش زیاد دەکات.
“کە دار پرتەقاڵ و زەیتوونەکان بەریانگرت ئەوکات لەوانەیە بدرێت بە کۆمپانیایەک تاوەکو سود لە بەرهەمەکە وەربگرێت جا بۆ فرۆشتن بێت، یان لە کارگەکان بکرێن بە شەربەت و زەیت”، ئەندازیار رێبین وای وت
لە پاڕکەکانی هەولێر زۆربەی ئەو دارانەی کە دەچێندرێت داری ژاڵە و سیسەم و ئەلبیزیان، چونکە ئەو دارانە لەگەڵ کەش و هەوای ناوچەکە دەگونجێت و رێژەیەکی کەم ئاویان دەوێت، رێژەی سەوزایش لەهەولێر ئێستا بووە بە لە %20 و لە شەش ساڵی رابردوودا توانراوە %2.5 رێژە سەوزای زیاد بکرێت، چەند پڕۆژەیەکی تری سەوزایش ماوە کە ئەگەر تەواو بکرێت رێژەی سەوزایی زیاتر بەرزدەبێتەوە.
پێداچوونەوە: ئەحمەد مستەفا
