دهۆک لەسەر ستوونی کارەبا و پرد هەڵواسینی پۆستەری قەدەغەکرد

964+
ئەحمەد مستەفا

نزیکبوونەوەی هەڵبژاردنی پەرلەمانی عێراق، شارەوانی دهۆکی ناچار کردووە وەک پێشدەستی چەند رێنماییەکی نوێ بۆ رێکخستنی بانگەشەی هەڵبژاردنەکانی لیست و پاڵێوراوەکان بڵاوباکاتەوە.

حەوت رێنمایی سەرەکین، وەک شارەوانی وتوویەتی، ئامانج لەو رێنماییانە پاراستنی سیمای شار و خاوێنی ژینگەی پارێزگاکەیە، هەروەها رێگریکردن لە شێواندنی شوێنە گشتییەکان بەهۆی پۆستەری هەڵبژاردنەوە.

لە یەکێک لە رێنماییەکان، شارەوانی دهۆک هەڵواسینی پۆستەری لە ستوونەکانی رووناک کەرەوە و بەرزە پردەکان قەدەغە کردووە، هەروەها هەڵواسینی پۆستەری لە ناوچە بازاڕییە سەرەکییەکانی ناوشاری دهۆک و شوێنەوارە مێژووییەکان قەدەغە کردووە.

خاڵە سەرەکییەکانی ڕێنماییەکان بریتین لە:

1- قەدەغەکردنی هەڵواسینی پۆستەر لەسەر دامەزراوە حکومییەکان و شوێنە ئایینییەکان (وەک قوتابخانە، نەخۆشخانە، فەرمانگەکان و مزگەوت).

2- ڕێگە پێنادرێت پۆستەر و لافیتە لەسەر ستوونی کارەبا، تابلۆکانی هاتوچۆ، پردەکان، دیوارە گشتییەکان، باخچە و پارکەکان هەڵبواسرێن.

3- شارەوانییەکان بە هەماهەنگی لەگەڵ کۆمسیۆنی باڵای هەڵبژاردنەکان، شوێنی تایبەت بۆ بانگەشە دیاری دەکەن و دەبێت پاڵێوراوەکان پابەندی ئەو شوێنانە بن.

4-  هەڵواسینی پۆستەر لە ناوچە بازاڕییە سەرەکییەکانی ناوشاری دهۆک و شوێنەوارە مێژووییەکان قەدەغەیە.

5-  بانگەشە تەنها لە کاتی دیاریکراوی خۆیدا ڕێگەپێدراوە و دەبێت 24 کاتژمێر پێش ڕۆژی دەنگدان بوەستێنرێت.

6- هەموو لایەن و پاڵێوراوەکان بەرپرسیارن لە لابردن و پاککردنەوەی پۆستەر و کەرەستەکانی بانگەشەی خۆیان لەدوای تەواوبوونی هەڵبژاردن.

7- لەمێژووی هەڵبژاردنەکانی پێشوودا، هەڵواسینی ناڕێکی پۆستەر لە دهۆک نیگەرانیی لای هاووڵاتییان دروست کردبوو. دەرکردنی ئەم ڕێنماییانە هەوڵێکە بۆ ڕێگریکردن لە دووبارەبوونەوەی ئەو دیاردەیە و دڵنیابوون لەوەی کە کێبڕکێی سیاسی کاریگەری خراپی لەسەر جوانی شار و ژینگە نەبێت.