سزاكانی سەر تابلۆ و ریكلامە زێدەڕۆكان تووندتر دەكرێت

964+

ئەرسەلان عەبدوڵا

سەرۆكی شارەوانیی هەولێر دەڵێت، هەڵمەتی لابردنی تابلۆ و ریكلامەكان، كە بە نایاسایی لە شەقام و شوێنە گشتییەكان دادەنرێن، بەردەوام دەبن و سزاكانیش تووندتر دەكرێت لە حاڵەتی دووبارەبوونەوەیان دا.

كارزان عەبدولهادی ئەمڕۆ یەكشەممە 14.9.2025 بە 964ی راگەیاند، هەڵمەتی لابردنی هەموو زێدەڕۆییەکان بەردەوامە و فراوانیشە، هەموو تابلۆ و ریكلامێك، كە بە نایاسایی لە شەقام و شوێنە گشتییەكان دانرابێت و سیمای شاری تێكدابێ، لادەدرێت و سزاکان تووندتر دەکرێن، بە تایبەتی ئەگەر خاوەنی ئەو تابلۆیانە دووبارەی بكەنەوە.

” ئەمە هەوڵی رێکخستنەوەی شاری هەولێرە بە شێوەیەکی چڕتر، زۆربەی ئەو ریکلام و تابلۆ نایاسایانەی بە هەڕەمەکی هەڵواسراون، بوونەتە هۆی شێواندنی شوێنی گشتی و شەقامەکان و ناشیرینکردنی سیمای شار، لایان دەبەین”، سەرۆكی شارەوانیی هەولێر وای وت.

هەروەها ئاماژەی بەوەدا، هەڵمەتەكە تازە نییە و دەمێكە دەستیپێكردووە، بەڵام ئەمجارەیان شارەوانییەكانی چوار و پێنج كارەكانیان چڕكردووەتەوە و بە تەنیاش نین، پۆلیسی شارەوانییشیان لەگەڵە و تا ئێستا ریکلام و تابلۆی بازرگانیی زۆر شوێنیان لابردووە.

دەشڵێت، بۆ كەمكردنەوەی ئاستەنگی هاتوچۆی هاوڵاتیان و شوفێران هەڵمەتەكە هێشتا بەردەوامە و لە تەواوی سنووری سەرۆكایەتیی شارەوانیی هەولێر و بەڕێوەبەرایەتیی خزمەتگوزاری و ژینگەپارێزی بەردەوام دەبێت .