بارى دەروونى تەواو نییە
فریاى بکەون؛ ئاوساوە و بەڕووتى لەبەردەم شوقەکانى کارێزە وشک فڕێدراوە
964+
دیلان محەمەدجەزا – سلێمانى
کەسێک کە بارى دەروونى تەواو نییە، لەبەردەم شوقەکانى کارێزەوشک لە شارى سلێمانى، بەڕووتى فڕێدراوە شوێنەکەى پیس کردووە و گرفتى بۆ دانیشتوانى شوقەکان دروست کردووە.
دانیار دانا، دانیشتوویەکى شوقەکانى کارێزەوشکە و ئەو کەسە لەبەردەمى دەرگاى ماڵیان فڕێدراوە، دانیار حاڵەتەکە بە تراژیدیا ناو دەبا و بە 964ـى وت،”ئێمە چەند بۆ حاڵى خۆمان گرفتارین، ئەوەندەش بۆ حاڵى ئەو کەسە، چونکە لەرووى ئینسانییەوە دیمەنێکى ترسناکە و کەسەکە جوێن دەدات و شوێنەکەى پیسکردووە، تەنانەت نایەڵم دایکم بێتە دەرەوە و دیمەنەکە ببینێت”.
کەسەکە هەموو گیانى رووتە و جلوبەرگى لەبەر نییە، جگە لەوەى بارى دەروونى تەواو نییە، جەستەى ئەستوور بووە و پێویستى بەچارەسەرى بەپەلە هەیە.
شێخ هادى حوسێن، پیاوێکى ریشسپى دانیشتووى شوقەکانى کارێزە وشکە، بۆ 964 قسەى کرد و وتى،”ئەو کەسە سەرەتا بارى دەروونى باشبوو، دەهاتە مزگەوت و کێشەى نەبوو، دواتر دۆخى خراپ بوو و خێزانەکەشى بەهەمانشێوە بارى دەرونیان باش نییە و کوڕەکەیان فڕێداوەتە بەردەم شوقەکان”.
دانیشتوانى ئەو شوقانە نیگەرانن لە بینینى دیمەنەکان، وە باسى دەکەن، ئەو کەسە پێویستى بە چارەسەرە و پێویستە لایەنە پەیوەندیدارەکان بەهانایانەوە بێن، هەم کەسەکە و هەم دانیشتوانى ئەو شوقانەش رزگار بکەن.
دیمەنەکانى ئەو کەسە بەشێوەیەکن کە 964 ناتوانێت بەبێ پەردە بڵاویان بکاتەوە، بەڵام ئەوەى هەیە کەسەکە لەبەر گەرما و لەسەر شۆستەیەکى رەق و لەو گەرمایە بەبێ جل و بەرگ راکشاوە و دەورووبەرى خۆى پیسکردووە.
پێداچوونەوە: وریا فەتاح
