خەمەکەی ژینگەی ناوچەکەیە
مامۆستایەک زبڵدان بۆ ئامێرەکانی راکێشانی پارە دادەنێ
964+
هیڤی دێوالی – دهۆک
مامۆستایەک لە دهۆک، ژمارەیەک زبڵدانی لەسەر ئەرکی خۆی کڕیوە و لە بەردەم ئامێرەکانی وەرگرتنی پارە ATM دایناون، تا پسوڵەی وەرگرتنی پارە بە ژینگە و دەورووبەری ئامێرەکان بڵاونەبنەوە و سیمای ناوچەکە تێک بدەن.
ئەو کارەی مامۆستاکە جارێ سەنتەری دهۆکی گرتووەتەوە.
سەدیق جەلالەدین، مامۆستای هونەرە و ژینگەدۆستێکی پاڕێزگای دهۆکە، ئەو بە 964ـی وت، فەرمانبەران کاتێک دەچن موچەکانی خۆیان لە ئامێرەکانی ATM وەربگرن، فاتورە “پسوڵەی” وەرگرتنی موچە فرێدەدەن و ئەمەش دیمەنی دەورووبەری ئامێرەکانیان ناشرین کردووە.
لەسەر ئەرکی خۆی، تاوەکو ئێستا 14 زبڵدانی کڕیوە و لە لای ATM کانی سەنتەری شار دایناون، ئەو داوا لە فەرمانبەرەکان کرد، ژینگەکە لە هەر پاشماوە و خاشاکێک بپارێزن.
ئەو مامۆستایە باسی لەوەشکرد، دوای سەنتەری شاری دهۆک، لە ATM کانی دەورووبەری پارێزگای دهۆکیش ژمارەیەکی دیکەی زبڵدان دادەنێت.
لە زۆربەی وڵاتان، جیهاز و ئامێرەکانی راکێشانی پارە شوێنێکیان بۆ دروستکراوە وەک زبڵدان کە دوای پارە وەرگرتن، پسوڵەکەی دەکەیتە ناوی، پێدەچێ ATMـەکانی کوردستان لەوەیان کەم بێ.
پێداچوونەوە: ئەحمەد مستەفا
