"زیانی گیانی نەبووە"
ئاگری شوقەکانی مامۆستایانی هەولێر بە زیاتر لە 15 تیم کۆنتڕۆڵکرا
964+
عەبدولعەزیز خالند – هەولێر
ئاگری شوقەکانی مامۆستایانی هەولێر بە زیاتر لە 15 تیم کۆنتڕۆڵکراوە و تەنیا زیانی ماددی لێکەوتووەتەوە و زیانی گیانی نەبووە.
شاخەوان سەعید وتەبێژی بەرگری شارستانی هەولێر بە 964 وت، “کاتژمێر 11:40 خولەکی پێشنیوەڕۆی ئەمڕۆ دووشەممە 1.9.2025 ئاگادارکراینەوە کە ئاگرێک لە شوقەکانی مامۆستایان کەوتووەتەوە، دوای پینج خولەک تیمەکانمان گەیشتنە شوێنەکە و توانیان ئاگرەکە کۆنتڕۆڵ بکەن”.
ئاماژەی بەوەشکرد، بە زیاتر لە 15 تیم و شەش ئۆتۆمبێل سەرقاڵی کوژاندنەوەی ئاگرەکە بوون و جگە لە زیانی ماددی، زیانی گیانی نەبووە و کەسیش بریندار نەبووە، تا ئێستاش زیانە ماددییەکان بە وردی نەزانراوە و دواتر بە راپۆرتێک ئاشکرای دەکەن.
سەبارەت بە هۆکاری سەرهەڵدانی ئاگرەکە، شاخەوان سەعید وتی، “گومان دەکەین ئاگرەکە لە قاتی خوارەوە تەشەنەی سەندبێت بۆ شوقەکانی سەرەوە و دواتریش لەرێی کامێرەکانی چاودێرییەوە هۆکارەکەی روون دەبێتەوە”.
پێداچوونەوە؛ شۆڕش قادری
ئاگرێک لە شوقەکانی شاری مامۆستایانی هەولێر کەوتەوە
