لە باڵەکایەتی کۆمەڵێک مین و تەقەمەنی لەناوبران – وێنە؛ دەزگای گشتی کاروباری مین
زیاتر لە 20 هەزار مینیش لەناوبراون
لە ماوەی شەش ساڵدا 52 کێڵگە بە تەواوی لە مین پاک كراونەتەوە
964+
ژێوار خدر
دەزگای گشتیی کاروباری مین، زیاتر لە 11 ملیۆن و 373 هەزار و 50 مەتردووجا زەوی لە مین پاک کردووەتەوە و
52 کێڵگەی مین بە تەواوی پاک کراونەتەوە و رادەستی خاوەنەکانیان کراونەتەوە، كە کاریگەرییەکی ئەرێنیی گەورەی لەسەر ژیان و گوزەرانی دانیشتوانی ئەو ناوچانە هەبووە.
فەرمانگەی میدیا و زانیاری رایگەیاند، لە رووی لەناوبردنی مین و تەقەمەنیەوە، تیمەکانی دەزگای گشتیی کاروباری مین، سەرکەوتوو بوون لە لەناوبردنی زیاتر لە 20 هەزار و 856 مین و زیاتر لە 125 هەزار و 627 پارچە تەقەمەنیی دیكەی پاشماوەی جەنگ، کە هەڕەشەیەکی مەترسیدار بوون لەسەر سەلامەتیی خەڵک.
دەشڵێت، ئێستا دەزگای گشتیی کاروباری مین هەڵمەتێکی چڕی هۆشیارکردنەوەی دەست پێکردووە بۆ گەیاندنی پەیامەکانی مەترسیی مین و تەقەمەنی بە هاوڵاتییان، تیمەکانی هۆشیاریی رۆژانە لە گەرمیانەوە تاوەکوو زاخۆ، سەردانی ناوچە سنوورییەکان و ئەو ناوچانە دەکەن، کە لە نزیک کێڵگە مینەکانن، بۆ ئەوەی زانیاریی پێویست بە خەڵک بگەیەنن و رێنماییان بکەن، كە چۆن لە مەترسییەکانی مین خۆیان بپارێزن.
