دوای سێ رۆژ ئاگرەکەی دەڤەری مزوریان لە زاوێتە کۆنتڕۆڵکرا

964+

شۆڕش قادری

دوای سێ رۆژ ئاگرەکەی دەڤەری مزوریان لە ناحیەی زاوێتەی دهۆک بە هەوڵی تیمەکانی بەرگری شارستانی و خەڵکی ناوچەکە کۆنتڕۆڵکرا.

سێ رۆژ لەمەوبەر ئاگرێک لە دەورووبەری حەوت گوندی دەڤەری مزوریان لە سنوری ناحیەی زاوێتە و ئەتروش سەریهەڵدا و کەمێک لەمەوبەر بەرگری شارستانی دهۆک لە راگەیەنراوێکدا بڵاویکردەوە، 150 ئەفسەر و کارمەندی بەرگری شارستانی دهۆک بۆ ماوەی 48 کاتژمێر و بێ راوەستان توانیان ئاگرەکە کۆنتڕۆڵ بکەن.

ئاماژە بەوەشکراوە، ئاگرەکە بە هەماهەنگی تیمەکانی بەڕێوەبەرایەتی پۆلیسی دارستان و فەرمانگەی ژینگەی دهۆک بەتەواوەتی کۆنتڕۆڵکراوە و جگە لە زیانی ماددی، زیانی گیانی لێنەکەوتووەتەوە.

پێشتر بێوار عەبدولعەزیز وتەبێژی بەرگری شارستانی دهۆک بە 964ـی وتبوو، بەهۆی ئاگرەکەوە زیاتر لە 500 دۆنم زەوی لە پوش و پەڵاش و دارستان سووتاوە و ژمارەیەک داری سروشتیش زیانیان پێگەیشتووە.

دوو رۆژە ئاگر لە ناحیەی زاوێتە کەوتووەتەوە و هێشتا کۆنتڕۆڵ نەکراوە