ئەگەر مەترسی هەبوو ئاڵای سور لە کێڵگە نەوتییەکان هەڵدەکرێ

964+
ئەحمەد مستەفا

ئەم رۆژانە زیاتر لە هەرکاتێک لەناو کێڵگە و دەوربەری کێڵگە نەوتی و غازییەکان هەست بە مەترسی هێرشی درۆنی دەکرێ، بەو پێیە لە ماوەی 17 رۆژی رابردوو 19 هێرش بۆ سەر چەند ناوچەیەک ئەنجامدراوە، کە زۆرینەیان کێڵگە نەوتی و غازییەکان بووە.

رەنگە لێرە و لەوێ ئاڵای سوور ببینی، دەبێ ئەوە بزانرێ ئەو ئاڵایە، نە کۆمپانیا و نە خاوەندارێتی پڕۆژە و وڵاتەکەیە، بەڵکو ئاماژەیە بۆ هەبوونی مەترسی لە ناوچەکە.

ئاڵای سور، لە کێڵگەی نەوتی و پیشەسازی نەوتیدا هێمای مەترسی و رێگرییە، ئەم ئاڵایە لە حاڵەتە فریاکەوتنەکانی (ئاگر، تەقینەوە، ژەهراوی بوون، فشاری بەرز یان بەتایبەتی لەکاتی بەرزبوونەوەی پلەی گەرمی ) هەڵدەدرێت بۆ ئاگادارکردنەوەی کارمەندەکان کە پێویستە کار نەکەن یان نزیک نەبنەوە بۆ پاراستنی سەلامەتی.

کات و هۆکارەکانی هەڵدانی ئاڵای سور:
1- ڕوودانی ڕووداوێکی مەترسیدار (وەک ئاگر، تەقینەوە، ڕزگارکردنی گازی ژەهراوی).
2- پێداچوونەوەی سەلامەتی یان چاڵاکییە پلانگیراوەکانی پاککردنەوە.
3- هەبوونی مەترسییەکی نادیار (وەک پەستانێکی بەرز لە سیستەمەکان).
4- بەرزبوونەوەی پلەی گەرمی لە وەرزی هاوین.

بە گوێرەی زانیارییەکانی پێگەی غاز و نەوتی کوردستان بێت کە 964 بینیویەتی، ئاڵای سور لە کێڵگەی نەوتیدا لەلایەن بەشی سەلامەتی و تەندروستی (HSE – Health, Safety & Environment) یان ئەندامانی فریاگوزاری (Emergency Response Team) هەڵدەدرێت، ئەم بەشانە بەرپرسیارن لە ڕێکخستنی سەلامەتی و فریاکەوتنەوە لە کێڵگەی نەوتیدا.

کێ دەتوانێت ئاڵای سور هەڵبدات؟
1. بەڕێوەبەری سەلامەتی (HSE Manager/Officer) – بە پێی پێویست لە کاتی مەترسیدا.
2. ئەندامانی چاودێری کارگە (Supervisors/Shift Leaders) – ئەگەر مەترسییەکی یەکسەری ببینن.
4. ئەندامانی ئاگرکوژێنەوە – لە کاتی هاتنیان بۆ شوێنی ڕووداو.

بابەتەکە هەر ئاڵای سوور نییە، بەڵکو  هەڵدانی ئاڵای پرتەقاڵی لە کێڵگە نەوتییەکان بە مانای ئاگادارییەکی تایبەت دێت کە پێویستی بە ئاگاداری و چاودێری زیاتر هەیە، بەڵام بە رێژەی ئاڵای سوور مەترسیدار نییە.

هێرشى درۆنى کرایە سەر پاڵاوگەیەکى نەوت لە شێخان

كۆمپانیا بیانییەكانی هەرێم باكیان بە درۆن نییە و ناكشێنەوە