فرۆکەیەکى هێڵى ئاسمانى عێراقى...وێنە: ئاژانسى هەواڵى عێراقى
74 گەشتمان کردووە
هێڵی ئاسمانیی عێراقی: لە هەفتەیەکدا 23 هەزار گەشتیارمان گەڕاندووەتەوە
964+
وریا فەتاح
وەزارەتی گواستنەوەی عێراق ئاماری کارەکانی هێڵی ئاسمانیی عێراقیی بۆ ماوەی هەفتەیەک بڵاوکردەوە و رایگەیاند، لە چوارچێوەی پلانی بەپەلە بۆ گەڕاندنەوەی هاوڵاتیانی گیرخواردوو، 74 گەشتی ئاسمانی ئەنجامدراون و 23 هەزار و 157 گەشتیار گواستراونەتەوە.
بەپێى راگەیەندراوێکى نووسینگەی راگەیاندنی وەزارەتی گواستنەوە، بە راسپاردەی محەمەد شیاع سودانی، سەرۆک وەزیران و بە سەرپەرشتیی راستەوخۆی رەزاق محێبس سەعداوی، وەزیری گواستنەوە، پلانی گەڕاندنەوەی ئەو هاوڵاتیانەی لە فڕۆکەخانەکان گیریانخواردبوو، جێبەجێکرا.
گەشتەکان بە هەماهەنگیی وەزارەتەکانی گواستنەوە و دەرەوە و دەسەڵاتی فڕۆکەوانیی مەدەنی ئەنجامدراون و بۆ ئەم شوێنانە بوون،(بەیروت، ئەستەنبوڵ، ئەنتاڵیا، کوالالومپور، دوبەی، قاهیرە، جۆرجیا، مۆمبای، دەلهی، ئەنقەرە، سەبیحە، پەکین، کەراچی، ئیسلام ئاباد و مەسقەت).
لاى خۆیەوە، بەڕێوەبەری گشتیی هێڵی ئاسمانیی عێراقی وتویەتى،”کۆمپانیاکەمان توانیویەتی ژمارەیەکی زۆر هاوڵاتی لە رێگەی فڕۆکەخانەی نێودەوڵەتیی بەسرەوە بگەڕێنێتەوە، و ئێمە تاکە لایەنی نیشتمانین کە لەم دۆخە گرژەی ناوچەکەدا ئەم ئەرکە جێبەجێ دەکەین. جگە لە عێراقییەکان، هاوڵاتیی عەرەب و بیانیشمان گواستووەتەوە”.
بەپێى راگەیەنراوەکەى وەزارەتى گواستنەوە، فڕۆکەخانەی نێودەوڵەتیی بەسرە بووەتە ناوەندی سەرەکیی کارەکانی هێڵی ئاسمانیی عێراقی و هەموو تواناکانی خراونەتەگەڕ بۆ بەڕێوەبردنی گەشتەکان.
بانگەوازیش بۆ گەشتیاران دەکات، کە بلیتیان لە بەیروت و تورکیا هەیە و ئەوانەى دەیانەوێت بگەڕێنەوە، پێش کۆتایی ئەم مانگە سەردانی نووسینگەکانی بڕینی بلیت بکەن بۆ جێگیرکردنی شوێنەکانیان.
ئەوەش لە کاتێکدایە، بەهۆى شەڕى ئیسرائیل و ئێران، ئاسمانى عێراق داخراوە و فڕۆکەخانەکان گەشتەکانیان راگرتووە، تەنیا فڕۆکەخانەى بەسرە نەبێت کە بەشێوەیەکى سنووردار گەشتى تێدا ئەنجام دەدرێت.
