پێشانگەی منداڵانی توشبووی شێرپەنجە،وێنە:+964
منداڵانی توشبووی شێرپەنجە تابلۆکانیان نمایشکرد
964+
دیلان محەمەد
لە رۆژی جیھانی شێرپەنجەی منداڵان، پێشانگایەکی تایبەت بە تابلۆکانی منداڵانی توشبووی شێرپەنجە لە مۆزەخانەی ئەمنەسورەکە لە سلێمانی کرایەوە.
تۆڕی 964 دەزانێت، ھیچ کام لە تابلۆکانی پێشانگاکە بۆ فرۆشتن نییە و تەنیا بۆ نمایشکردنە، ئەمە یەکەم پێشانگای تایبەتە بە کاری دەستیی منداڵانی توشبووی شێرپەنجە.
پرژە شادومان مامۆستای ھونەرە لە نەخۆشخانەی ھیوای تایبەت بە چارەسەری شێرپەنجە بە تۆڕی 964ی وت، ئەم پێشانگایە بۆ توشبووانی شێرپەنجەیە، پێکھاتووە لە 84 تابلۆ و سەرجەمیان بە دەستی ئەو منداڵانە کێشراون کە توشبووی شێرپەنجەن.
باسی لەوەکرد، “ستافی منداڵپارێزی کوردستان لە نەخۆشخانەی ھیوان و سەرجەم پێداویستییەکان بۆ منداڵەکان دابینکراوە”.
تۆڕی 964 تێگەیشت لەوەی، ئەو منداڵانەی کارەکانیان نمایشکراوە باری تەندروستیان جێگیر و باشە و تەمەنیان لە نێوان 6 بۆ 17 ساڵە.
پێداچوونەوە: هێمن بەکر