دۆشاوە تەماتەكەی بەشەخۆراكی بەغدا وەک نارنجۆك دەتەقێتەوە

964+

محەمەد فاتیح

زۆر جار گلەیی لە مادە خۆراكیەكانی بەشەخۆراكی مانگانە دەكرێت كە لەلایەن وەزارەتی بازرگانی عێراقەوە بەسەر هاوڵاتیاندا دابەش دەكرێت، بە تایبەتی دۆشاو تەماتەكەی كە دواجار ڤیدیۆیەكیان لەسەر بڵاوكردەوە و وتیان، كەڕووی كردووە و وەزارەتی بازرگانی عێراق رەتیكردەوە، بەڵام ئەمجارە ناتوانێت رەتیبكاتەوە، چونكە 964 ژمارەیەك لەو قووتو دۆشاو تەماتانەی لە بەردەستدایە، كە كاتێك دەیكەیتەوە وەك نارنجۆک  دەتەقێتەوە و پەرش و بڵاودەبێتەوە.

964 یەكەم لایەنە كە ئەم جۆرە دۆشاو تەماتانە ئاشكرا دەكات و داوا لە لایەنی پەیوەندیدار دەكات لەبەر سەلامەتی گیانی هاوڵاتیان لێكۆڵینەوە لەم بابەتە بكەن كە رەنگە مەترسی بێت بۆ گیانیان.

964 زیاتر لە قووتویەكی ئەو دۆشاوی تەماتەیەی شكاندووە و هەر هەمووی كە هەڵی دەبچڕیت دەتەقێنەوە و زۆربەیان پرشەیان زیاتر لە مەترێك دەڕوات.

هەر وەك لە وێنەكانیش دەركەوتووە لەسەر قووتوی دۆشاو تەماتەكە نووسراوە، “وەزارەتی بازرگانی، كۆمپانیای گشتی بۆ بازرگانی مادە خۆراكیەكان، عێراق-بەغدا-كەڕادە-گەڕەكی وەحدە، بە تایبەت بۆ وەزارەتی بازرگانی دروستكراوە”.

964 لە سێ رۆژی رابردوو هەوڵیدا بەرپرسان لە وەزارەتی بازرگانیی عێراق و هەروەها بەڕێوەبەرایەتی دابەشكردنی كەلوپەلی خۆراك لە سلێمانی بدوێنێت، بەڵام كەسیان وەڵامی پەیوەندییەكانیان نەدایەوە، كە پێدەچێت بەهۆی پشووی جەژنەوە بێت.