دیمەنێکی شاری سلێمانی
بە سەوزایی و گوڵ دەڕازێندرێتەوە
پارکێکی تایبەت بەو ژنانە دەکرێتەوە کە لە شێڵتەرەکانن
964+
ژووری هەواڵ
لە سلێمانی لەسەر رووبەری هەشت هەزار مەتر دووجا، پارکێکی تایبەت بەو ژنانە دەکرێتەوە، کە لە شێڵتەرەکان داڵدەدراون.
وەزارەتی کار و کاروباری کۆمەڵایەتی رایگەیاند، رۆژی سێشەممە 3.6.2025 بەردی بناغەی پارکێکی حەوانەوە بۆ داڵدەدراوانی ماڵی داڵدەدانی ژنانی هەڕەشەلێکراو دانرا.
ئاریان ئەحمەد، وتەبێژی وەزارەتی کار و کاروباری کۆمەڵایەتی بە 964ـی راگەیاند، پارکەکە لەناو ماڵی داڵدەدانی ژنانی هەڕەشەلێکراو دەکرێتەوە و لەدوای تەواوبوونی رێکارە یاساییەکان دەستدەکرێت بە دروستکردنی.
پڕۆژەکە پێک دێت لە سەوزایی و باخچە و گوڵ و چیمەن و پارکێکی یاری بۆ ئەو منداڵانەی لەگەڵ داڵدەدراوانن و بەشێکیشی بۆ چالاکی وەرزشی بەکاردەهێنرێت.
کوێستان محەمەد، وەزیری کار و کاروباری کۆمەڵایەتی رایگەیاند، پارکەکە “کەشێکی ئارام بۆ ژنانی داڵدەدراوان دابین دەکات و لایەنی دەرونیان زیاتر سەقامگیر دەکات”.
تێچووی دروستکردنی پارکەکە زیاتر لە 64 ملیۆن دینارە پارکەکە و لەلایەن کۆمپانیایەک بەناوی “ماکس هاس” جێبەجێ دەکرێت.
