لە کەلار
منداڵێک فیشەکی بەرکەوت و گیانی لەدەستدا
964+
میلاد جەلال – گەرمیان
لەکەلار منداڵێک فیشەکی بەرکەوت و گیانی لەدەستدا.
عەلی جەمال قدوری وتەبێژی پۆلیسی گەرمیان بە 964ـی وت، “ئەمشەو لە گەڕەکی بەردەسوری قەزای کەلارەوە تەرمی منداڵێکی شەش ساڵان بەناوی ( لانۆ سرود سەعدون ) براوەتە نەخۆشخانەی شەهید هەژار کە بەهۆی بەرکەوتنی فیشەکەوە گیانی لەدەستدابوو”.
“بەوتەی باوکی، منداڵەکە لەکۆڵان یاری کردووە و ئاگادارکراوەتەوە کە منداڵەکەی فیشەکی بەرکەوتووە”، عەلی جەمال قدووری وای وت.
ئاماژەی بەوەشکرد، دەستبەجێ پۆلیس و تیمی کامێرامانی بەشی پۆلیسی کەلار چوونەتە شوینی رووداوەکە، دوای لێکۆڵینەوە و بەدواداچون دەرکەوتووە، منداڵێکی 10 ساڵان دەمانچەکەی باوکی کە کارمەندی هێزە ئەمنییەکانە، بردووتە کۆڵان و فیشەکی بەو منداڵەی دیکەوە ناوە.
وتەبێژی پۆلیسی گەرمیان وتیشی، منداڵەکە پاش گەیاندنی بە نەخۆشخانە گیانی لەدەستداوە و باوکی ئەو منداڵەش کە تەقەکەی کردووە، لەگەڵ منداڵەکەی دەستگیرکراون و بەبڕیاری دادوەر و بەپێی ماددەی ( 405 ) بەندکراون و لێکۆڵینەوە لە ڕووداوەکەش بەردەوامە.
پێداچوونەوە : سۆڕش قادری
