نۆژەنكردنەوەی یاریگەی نێودەوڵەتیى فڕەنسۆ هەریری دەستێپێدەكات

964+

ئەرسەلان عەبدوڵا

دوای چاوەڕوانییەكی زۆر بڕیاردرا یاریگەی فڕەنسۆ هەریری لە هەولێر نۆژەن بكرێتەوە، سەرۆكی یانەی هەولێریش رایگەیاند، كۆمپانیاكە هاتوون و سەیری یاریگەیان كردووە.

تاهیر سابیر سەرۆكی كاتیی یانەی هەولێر بە 964ی راگەیاند، بە بڕیاری پارێزگای هەولێر یاریگەی فڕەنسۆ هەریری نۆژەن دەكرێتەوە و بڕی نزیكەی دوو ملیار دیناری بۆ تەرخان كراوە.

وتیشی، ئەمڕۆ بەڵێندەری كۆمپانیای جێبەجێكار هاتوون و سەیری یاریگەیان كردووە، كە چیمەن، كورسی و پەیژەكان، ژووری جلگۆڕین و خزمەتگوزاری و دەرگاكان و چەند شوێنێكی دیكە پێویستیان بە نۆژەنكردنەوە هەیە.

سەرۆكی یانەی هەولێر لەگەڵ ئەوەشدا ئاماژەی بەوەدا، ئێستا یانەكەی پێویستی بە پارە و پاڵپشتیی دارایی هەیە، چونكە چەند یارییەكیان لە خولی عێراق ماوە و تیپەكانی دیكەی جگە لە تۆپی پێش یارییان لە دەرەوەی هەولێر هەیە، ئەمە جگە لەوەی موچەی یاریزانەكانیش قەرزارن.

بە پێی راگەیاندراوی پارێزگای هەولێر، بڕی یەك ملیار و 900 ملیۆن دینار بۆ نۆژەنكردنەوەی یاریگەكە تەرخان دەكرێت و لە دوای كۆتاییهاتنی ئەم وەرزەی خولی ئەستێرەكانی عێراق، كاری نۆژەنكردنەوەكە دەستپێدەكات، كە پێدەچێت بكەوێتە ناوەڕاستی مانگی داهاتوو.

پارێزگای هەولێر ئاماژەی بەوەش كردووە، ئەمڕۆ لەگەڵ كۆمپانیای جێبەجێكار كۆبوونەوەیان كردووە و وردەکاریى گۆڕینی چیمەنی یاریگەکە بۆ جۆرى ( هاى بێرد) کە زۆربەى یاریگە گەورە و جیهانییەکان بەو چیمەنە فەرشکراوە و کات و شێوەى دەستپێکردنى پڕۆژەکە خراوەتەڕوو.

یاریگەی فڕەنسۆ ھەریری، یاریگایەکی نێودەوڵەتیی شاری هەولێرە و بارەگەی یانەی ھەولێریشە.

یاریگەكە لە كۆتایی پەنجاكانی سەدەی رابردوو دروست كراوە و لە 1999 جارێكی دیكە لە لایەن پارێزگاری ئەوكاتی هەولێر “فڕەنسۆ هەریری” دووبارە بنیادنرایەوە، دواتریش لە 2001 یاریگەكە بە ناوی ئەو كەسایەتییەوە كرا، دوای ئەوەی تیرۆر كرا.

یاریگەكە چەند جارێك چیمەن و مەقسورەی سەرەكی نۆژەنكراوەتەوە، بەڵام نۆژەنكردنەوەیەكی سەرتاسەری نەبووە.

سیستمی ڤار گەیشتە یاریگەی فرانسۆ هەریری