بەشێک لە گوندەکانى قەزاى چوارتا
ئەو رێگایانەی باران تێکیداون شارەوانی چاکیدەکاتەوە
964+
محەمەد فاتیح
لەگەڵ نزیکبوونەوەی وەرزی بەهار و هاوین ئەو رێگایانەی باران و سەرمای زستان تێکیداون نوێ دەکرێنەوە، رێگای سەرەکی گوندی کوڕەداویش لە سنوری قەزای چوارتا بەر هەڵمەتەکەی شارەوانی کەوت.
ساڵانە بەهۆى بارانبارینەوە رێگەى بەشێک لە گوندەکانى قەزاى چوارتا تێکدەچن و ئاستەنگ بۆ هاتووچۆى دانیشتوانەکانیان دروستدەبێت، بەڕێوەبەرایەتی گشتی شارەوانییەکانی سلێمانی، هەڵمەتێکى گشتگیری بۆ چاکردنەوەى ئەو رێگایانە ئەنجامداوە،
هاوکات لەگەڵ چاککردنەوەی رێگاکان، لە ناحیەی قادر كەرەم ژینگەپارێزان سەرقاڵى جوانکردن و سەوزترکردنى باخچەکانى ناوەندى ناحیەکەن و لەو رێگەیەوە دەیانەوێت سیمایەکى جوانتر و گەشتر بە شارەدێیەکەیان ببەخشن، چونکە لەگەڵ نزیکبوونەوەى وەرزى بەهار و چرۆدەرکردنى درەخت و نەمامەکان، دەستكراوە به هەڵمەتێکى بەردەوامى پاککردنەوە و بڕین و ئاودانى سەوزایی باخچەکان.
قەزاى چوارتا و ناحیەی قادرکەرەم له قەزای چەمچەماڵ دەكەونە سنورى پارێزگای سلێمانیەوە.
