بەهای تمەنی ئێرانی بەرزبووەوە و دیناریش دابەزی - وێنە: گرافیکی 964
ئەمریکا دەڵێ گفتوگۆی راستەوخۆ دەکەین و ئێرانیش دەڵێ نایکەین
بە لێدوانێکی ترەمپ بەهای تمەنی ئێرانی بەرزبووەوە و دیناریش دابەزی
964+
شۆڕش قادری
دوای ئەوەی دۆناڵد ترەمپ سەرۆکی ئەمریکا رایگەیاند، گفتوگۆی راستەخۆ لەگەڵ ئێران دەکەن، بەهای تمەن بەزربووەوە و دیناریش کەمێک دابەزی.
کەیفی خۆشناو وتەبێژی بازاڕی دراوی هەولێر بە 964ـی وت، “ئەمڕۆ سێشەممە 8.4.2025 هەر 100 دۆلاری ئەمریکی بە 10 ملیۆن تمەن مامەڵەی پێوەکراوە بە حەواڵە و بە نەختیش، بە هەشت ملیۆن و 500 هەزار تمەن بوو”.
ئەوەش لەکاتێکدایە، لە بەرەبەری نەورۆزدا بەهای تمەنی ئێرانی داڕمانی مێژوویی تۆمارکرد و لە چەند رۆژی رابردووشدا هەر 100 دۆلاری ئەمریکی، تا نزیکەی 10 ملیۆن و 500 هەزار تمەن بەرزبووەوە.
وتەبێژی بازاڕی دراوی هەولێر بەرزبوونەوەی بەهای تمەنی بۆ لێدوانەکەی ترەمپ گەڕاندەوە کە وتی، گفتوگۆی راستەوخۆ لەگەڵ ئێران دەکەن.
بەقسەی کەیفی خۆشناو، ئەمڕۆ لەکاتی داخستنی بازاڕی دراو، 100 دۆلار بە 147 هەزار و 750 دینار بووە و بەراورد بە دوێنێ بەهای 100 دۆلار، نزیکەی 500 دینار بەرزبووەتەوە.
هەرچەندە بەرپرسانی ئێران بەردەوام دانیشتنی راستەوخۆیان لەگەڵ بەرپرسانی ئەمریکا رەتکردووەتەوە بۆ چارەسەرکردنی ناکۆکییەکانیان، بەڵام دوێنێ دووشەممە دۆناڵد ترەمپ رایگەیاند، گفتوگۆی راستەخۆ لەگەڵ تاران دەکەن، لە نوێترین لێدوانیشدا عەباس عێراقچی وەزیری دەرەوەی ئێران رایگەیاند، ئامادەن بۆ رێککەوتن و شەممەی داهاتوو لەگەڵ لایەنی ئەمریکی لە عوممان، دانوستانی ناڕاستەوخۆ دەکەن، جگە لەوەش، شێوازی دیکە بۆ دانوستان قبوڵ ناکەن.
وتەبێژی بازاڕی دۆلارەکە: بارگرژیەکان بەردەوام بن داڕمانی زیاتری تمەن دەبینین
دۆلار و تمەن پێکەوە دابەزین و دیناریش بە تەنیا بەرزبوویەوە
