964+

ئەرسەلان عەبدوڵا

شەڕ و ئاژاوە و كودەتا لە وڵاتی سودان كۆتایی نایەت و ئەم بەیانییە سوپای سودان دەستی بەسەر كۆشكی سەرۆكایەتی وڵاتەكەدا گرت.

سەرچاوە سەربازییەکان بۆ ئاژانسی رۆیتەرز پشتڕاستیان کردەوە، کۆشکی سەرۆکایەتی لە خەرتووم كەوتە ژێر کۆنتڕۆڵی سوپای سودان، دوای ئەوەی هێزەکانی لە لای رۆژهەڵاتەوە هاتنە ناوەوە.

لەم دواییانەدا، شەڕ و پێکدادانی توندوتیژ لە نێوان هێزەکانی سوپا بە سەرۆکایەتی عەبدولفەتاح ئەلبورهان و هێزەکانی پشتیوانی خێرا بە سەرۆکایەتی محەمەد حەمدان دەقەڵوو روویدا، ئەمەش لە هەوڵێکدا بوو لەلایەن سوپاوە بۆ کۆنتڕۆڵکردنەوەی کۆشکەکە.

كۆنتڕۆڵی ئەمڕۆی سوپای سودان بەسەر کۆشکی سەرۆکایەتی، دوای ئەوە دێت دوو ساڵ لەمەوبەر كۆشكەكە كەوتە دەست هێزەكانی پشتیوانی خێرا.

شەڕ و ئاڵۆزییەكان لە دوێنێ پێنجشەممەوە گەیشتە قۆناغێكی سەخت و دەنگی تەقینەوە و رووبەڕووبوونەوە لە سەرانسەری خەرتومی پایتەختدا بیسترا، كە لە چەند رۆژی رابردوودا شەڕی توند لە نێوان سوپا و پشتیوانی خێرا هەبوو.

سەرچاوەیەکی سەربازی کە ناوی ئاشکرا نەکردووە، بە ئاژانسی فرانس پرێسی وتووە، سوپا کاروانێکی 30 ئۆتۆمبێلی هێزی پشتیوانی خێرای تێکشکاند کە هەوڵی کشانەوەیان بۆ باشوور دەدا.

سوپای سودان رۆژی دووشەممە کەتیبەکانی لە ناوچەی باشوورەوە گواستەوە بۆ یەکخستنی هێزەکانیان لە ناوەڕاستی خەرتوم بە مەبەستی پێشکەوتنی زیاتر لە دژی هێزەکانی پشتیوانی خێرا.

ماوەی نزیکەی دوو ساڵە شەڕی سودان بەردەوامە و دەیان هەزار کوژراوی لێكەوتووەتەوە، هەروەها بووەتە هۆی ئاوارەبوونی زیاتر لە 12 ملیۆن کەس، هاوکات زیاتر لە 100 هەزار کەسیش ڕووبەڕووی مەترسی برسیەتیی بوونەتەوە بە گوێرەی داتاكانی رێکخراوی نەتەوە یەکگرتووەکان.

دوو لایەنی ململانێیەکان کۆنتڕۆڵی هاوبەشیان بەسەر ناوچە جیاوازەکاندا هەیە، سوپا باکوور و رۆژهەڵاتی کۆنتڕۆڵ كردووە، هێزەکانی پشتیوانی خێراش زۆربەی هەرێمی دارفور و چەند بەشێكی باشووریان بەدەستەوەیە.

964+

عەزیز عەبدوڵڵا- چەمچەماڵ

بەڵێنى بە منداڵەکانى دابوو لە پارەى موچەى مانگى سێ، جلى جەژنیان بۆ بکڕێت، بەڵام بەهۆى وونکردنى موچەکەى نەیتوانى بەڵێنەکەى جێبەجێ بکات، ئەمە چیرۆکى ژینگەپارێزێکى ئاغجەلەرە کە دواى وەرگرتنى، موچەکەى ونکرد.

محەمەد خەلیل کارمەندی پاککەرەوەیە لە شارەوانی ناحیەی ئاخجەلەر، ئەو لەبارەى ونکردنى موچەکەى بە 964ـى وت،”ئەمڕۆ چوم موچە وەربگرم، بەڵام قسمەت وابوو گیرفانى گەرم نەکردمەوە و دواى ئەوەى وەرمگرت، لە کاتى گەڕانەوە بۆ ماڵەوە لێم ونبوو”.

محەمەد خەلیل، باوکى سێ منداڵە و لە خانوى کرێدا دەژیت، موچەکەى 425 هەزار دینارە و 14 ساڵە کارمەندى پاککەرەوەى شارەوانییە

وەک ئەوەى ئەو ژینگەپارێزە باسى دەکات، موچەکەى تاکە بژێویەتى و جگە لەوە هیچ سەرچاوەیەکى دیکەى نییە.

محەمەد خەلیل بەنیاز بووە، بە پارەى ئەو موچەیە بچێتە بازاڕ و جلى جەژن بۆ منداڵەکانى بکڕێت، وەکخۆى دەڵێت،”وەعدم پێدابوون کە جلى جوانیان بۆ بکڕم، بەڵام دواى ئەوەى زانیم موچەکەم ونکردووە کە چوومەوە ماڵەوە هیچم بۆ نەوترا”.

هەرچەندە دواى ئەوەى زانیویەتى موچەکەى لێ ونبووە، بەدوایدا گەڕاوە و وەکخۆى دەڵێت، کون و کەلـلەبەر نەماوە بەدوایدا نەگەڕێت، بەڵام وەک ئەوەى زەوى قوتى دابێت هیچ سۆراغێکى نەما.

داواش دەکات، هەرکەسێک دۆزیویەتییەوە بۆى بگەڕێنێتەوە، بۆ ئەوەى بەڵێنەکەى بباتەسەر و جلى جەژن بۆ منداڵەکانى بکڕێت.

پێداچوونەوە: وریا فەتاح

300 ژینگەپارێزی هەولێر داوەتكران و جەژنانەشیان وەرگرت