هەڵمەتی شارەوانییە

زێدەڕۆیی بازاڕەكانی هەولێر لادەبرێن

964+

ئەرسەلان عەبدوڵا

سەرۆکایەتیی شارەوانی هەولێر رایگەیاند، لە پێناو بەرژەوەندیی گشتی و کاسبکاران بە تایبەتی، هەڵمەتی رێكخستەوە و لابردنی زێدەڕۆییەكانی ناو چەند بازاڕێكی شاری هەولێریان ئەنجامدا.

شارەوانیی هەولێر لە راگەیاندراوێكدا ئاماژەی بەوەدا، تەواوی سەنتەری شار رێکدەخرێتەوە و گرنگی زیاتر بە بازاڕەکان دەدرێت، لەم چوارچێوەیەشدا ئەمڕۆ پێنجشەممە 30.1.2025  لەلایەن تیمەکانیان لە بەڕێوەبەرایەتیی شارەوانی یەک

بە هەماهەنگی لەگەڵ پۆلیسی شارەوانی، هەڵمەتێکی فراوانی رێکخستنەوە و لادانی زێدەڕۆیی لەسەر موڵکی گشتی بۆ هەر یەک لە بازاڕەکانی شێخەڵڵا، ئیسکان، سەیداوە، نیشتمان، داون تاون و بازاڕی سیروان و چەند شەقامێکی دیکەی سەرەکی لە سەنتەری شار بەڕێوەچوو.

“هەڵمەتەکە بە ئامانجی پاراستنی سەر و ماڵی کاسبکارانە لە رووداوە نەخوازراوەکان و هۆیەکانی ئاگرکەوتنەوە و هەروەها رێکخستنەوەی سیمای بازاڕ لە ناڕێکی و کەمکردنەوەی ئاستەنگی هاتوچۆ بۆ هاوڵاتیان و شوفێران”، شارەوانیی هەولێر وادەڵێت.

لە رۆژانی رابردووشدا كۆبوونەوەیەك لە دیوانی پارێزگای هەولێر بە بەشداریی سەرۆكی شارەوانی ئەنجامدرا، بە مەبەستی رێكخستنەوەی ناوشار و لابردنی زێدەڕۆییەكان.

هەڵمەتی رێکخستنەوەی شەقامەکانی هەولێر بەردەوامە

هەڵمەتی رێکخستنەوەی شەقامەکانی هەولێر بەردەوامە