بەراورد بە ساڵانی رابردوو
راوکردن لە گەرمیان کەمی کردووە
964+
میلاد جەلال – گەرمیان
بەپێی ئامارەکانی بەڕێوەبەرایەتی پۆلیسی دارستان و ژینگەی گەرمیان، لە ساڵی رابردوودا ژمارەی دەستگیرکردنی سەرپێچیکار 62 کەس زیادی کردووە، بەڵام راوکردن کەمی کردووە.
موقەدەم ھاشم عەلی، وتەبێژی بەڕێوەبەرایەتی پۆلیسی دارستان و ژینگەی گەرمیان ئامارەکانی ساڵی رابردووی بەڕێوەبەرایەتییەکەی بۆ 964 خستەڕوو و وتی، “لە ساڵی 2023، 147 سەرپێچیکار دەستگیرکراون، بەڵام لە ساڵی 2024 رێژەکە زیادیکردووە بۆ 209 سەرپێچیکار”.
باسی لەوەشکرد، جگە لە دەستبەسەرداگرتنی کۆمەڵێک کەرەستەی دار بڕین و دەستگیرکردنی راوچییەکان، ئاسکێکیش بە کوژراوی کە دەستی بەسەردا گیرابوو، دوای پشکنین بۆ شیاویی گۆشتەکەی، بە بڕیاری دادوەر لە زیادکردنێکی ئاشکرادا بە 240 ھەزار دینار فرۆشرا.
پێداچوونەوە: ژێوار خدر
