کۆمپانیای سێرکڵەر ئەنگوستیلەیەکی زیرەکی نوێ دەخاتە بازارەوە
تایبەتمەندییەکانی چین؟
کۆمپانیای سێرکڵەر ئەنگوستیلەیەکی زیرەکی نوێ دەخاتە بازارەوە
964+
رێبین هۆشیار
بە بڵاوکردنەوەی نەوەیەکی تری ئەنگوستیلە زیرەکەکەی، کۆمپانیای سێرکڵەر دەیەوێت رکابەری کۆمپانیای ئۆرا بکات کە تاکە رکابەرە لە گۆرەپانەکە بۆ ئەنگوستیلەی زیرەک.
ئەنگوستیلە نوێیەکەی سێرکڵەر کۆمەڵێک گۆڕانکاری و بەرەوپێشچون لەخۆ دەگرێت بە بەراورد بە نەوەی پێش خۆی، کە شکستی هێنا، رووکاری دەرەوەی ئەنگوستیلەکە بە تایتنیۆم داپۆشراوە کە بە رەنگی رەش و رەساسی و زێری و رۆز گۆڵد بەردەست دەبێت.
ماڵپەڕی TNW بڵاویكردەوە، بەرچاوترین تایبەتمەندی کە لە ئەنگوستیلەکەدا زیاد کراوە، بریتییە لە هەستەوەرێکی (سێنسەر) زیرەک بۆ چاودێریکردنی دڵ، هەستەوەرەکە دەتوانێت پێوانەی دڵ دیاریی بکات و بەکارهێنەر پێشوەختە ئاگادار بکاتەوە لە حاڵەتەکانی جەڵتە و نەگەیاندنی خوێن لە دڵەوە بۆ مێشک.
یەکێکیتر لە تایبەتمەندییەکانی بریتییە لە پێوانەکردنی درێژیی پەنجەکان، راستەخۆ لە نێو ئەپڵیکەیشنی تایبەت.
ئەمجارەیان بارگاویکەرەوەکەی وایارلێسیش دەبێت و باتری ئەنگوستیلەکە توانای خۆڕاگرتنی هەیە بۆ ماوەی هەشت رۆژ.
ئەنگوستیلەکەی کۆمپانیای سێرکڵەر وا بڕیارە لە کەمپەینێکی جەماوەری ئەم مانگە پیشان بدرێت و نرخیشی 380$ دەبێت.
ئەنگوستیلەکە گرانترە بە بەراورد بە ئەنگوسیلەکەی ئۆرا، بەڵام سێرکڵەر هیچ بڕەپارەیەکی مانگانە وەرناگرێت بۆ بەردەستخستنی تاتبەتمەندیەکانی ناو ئەنگوستیلەکە.
