لە لایەن سوپای عێراقەوە
چوار جوتیاری کورد لەسنووری هەفتەغار دەستگیرکران
964+
سیروان خورشید – دوزخورماتوو
ئێوارەی ئەمڕۆ چوارشەممە لە ئاوایی مەنسوری ناوچەی هەفتەغاری سەر بەقەزای داقوق، چوار جووتیاری کورد لەکاتی ئاودانی کێڵگە کشتوکاڵییەکانیان، لەلایەن سوپای عێراقەوە دەستگیرکران.
حەسەن گەرمیانی، نوێنەری جوتیاران و ئەندامی پێشوی ئەنجومەنی پارێزگای سەڵاحەدین بە 964ـی وت، جوتیارەکان سەرقاڵی ئاودێری زەویەکانیان بوون و لەو کاتەدا لە لایەن سوپای عێراقەوە هەڵکوتراوەتە سەریان و چوار جوتیاریان دەستگیرکراون و تاوەکو ئێستا چارەنوسیان نادیارە و نازانرێت بۆ کوێ بردراون.
وتیشی، ئەو جوتیارانە لەسەر زەویوزاری خۆیان بوون و زەویەکانیان هیچ کێشەیەکی لەسەر نییە و جوتیارەکان هیچ تاوان و تۆمەتێکیان لەسەر نییە و سوپا گێچەڵی پێکردوون و دەستگیری کردوون.
ئاماژەی بەوەشکرد، بەپێی زانیاریەکانمان ئەو هێزەی جوتیارەکانی دەستگیرکردووە، بەفەرماندەی ئۆپڕاسێۆنەکانی رۆژهەڵاتی دیجلە ناو دەبرێت، لەئێستادا لەرێگەی لایەنە پەیوەندیدار و ئەندامانی پەرلەمانی عێراق لەخورماتوو لەهەوڵدان بۆ دیاری کردنی چارەنوسی جوتیارەکان و ئازادکردنیان.
964 پەیوندی بە فەرماندەی ئۆپڕاسێۆنەکانی رۆژهەڵاتی دیجلەوە کرد لەخورماتو، بەڵام پەیوەندیەکەیان بەردەست نەبوو.
پێداچوونەوە: توانا نەقی
