دیمەنەكانی چوارشەممەی رابردوو دووبارە بوونەوە
رووداوێكی سەختی هاتوچۆ لە “سێگۆشەی بەرمۆدا”ی شەقامی 120 مەتری روویدا
964+
ئەرسەلان عەبدوڵا
بەیانیی ئەمڕۆ چوارشەممە 25.12.2024 رووداوێكی سەختی هاتوچۆ لە شەقامی 120 مەتریی هەولێر روویدا و سێ ئۆتۆمبێل بەیەكیاندادا، كە یەكێكیان بارهەڵگرێك بوو.
بەپێی ئەو دیمانەنانەی كامێرای 964 گرتوویەتی، رووداوەکە دەوروبەری سەعات 08:00 روویداوە و پێكدادانەكە قورسە، بە جۆرێك بارهەڵگرەكە بەشێكی چووەتە سەر شۆستەی نێوان هەردوو شەقامی چوون و هاتن، هەروەها ئۆتۆمبێلێكی دیكەیان كە تۆیۆتا كۆرۆڵایە بە تەواوی تێكشاوە و ئۆتۆمبێلەكەی دیكەش كە جۆرێكی چینییە، بەشی پێشەوەی تێكشكاوە.
964 نەیتوانی دڵنیابێتەوە لەوەی لە رووداوەكەدا گیانلەدەستدان یان بریندار هەیە یان نا.
ئەوەی جێی سەرنجە هەفتەی رابردوو هەر لە بەیانیی چوارشەممە و لە هەمان شوێندا، دوو رووداوی دیكەی هاتوچۆی هاوشێوە روویاندا و پێشتریش هەر لەو پانتاییەی بەرامبەر شوقەكانی جیهان و لە سایدی چوون، رووداوی هاوشێوەی پێكدادان روویانداوە و شوێنەكە وەك “سێگۆشەی بەرمۆدا”ی لێهاتووە.
شەقامی 120 مەتریی هەولێر كە پانیی هەر سایدێكی 15 مەترە، هاتوچۆ تێیدا زۆر ئاسانە، جگە لەوەی كە بە شێوەیەكی بازنەیی هەمووی بە كامێرای تۆماركردنی سەرپێچی كۆنتڕۆڵ كراوە، بەڵام هێشتا هەر رووداوی لێ روودەدات و شۆفێران بەهۆی تیژڕۆیی و پابەندنەبوون بە رێنماییەكانی هاتوچۆ، تووشی رووداو دەبن.
